رانيا يوسف: جوزي الأخير كان عقرب والستات مش المفروض تجيب هدايا للرجالة
كتب: عزة عبد الحميد
حلت الفنانة المصرية رانيا يوسف ضيفة في برنامج The Blind Date Show في حلقة أمس، وتدور فكرة البرنامج حول المواعدة ولكن دون رؤية الشخص حيث يفصل بين الثنائي جدار ضخم حتى نهاية الحلقة.
وخلال الحلقة أدلت رانيا يوسف بعدد من التصريحات والتي سنرصدها خلال الأسطر القادمة.
- دايمًا كان في مشاكل بيني وبين أمي ولحد دلوقتي فيه بينا مشاكل، وفضلت متحكمة في حياتي بشكل فظيع لحد 17 سنة.
- تربية أمي والمشاكل اللي كانت ما بينا خلتني أعمل العكس تمامًا مع بناتي وأسمعهم وأخليهم ياخدوا قرارتهم.
- بحكم إني بشتغل من فترة طويلة اتعودت أجيب حاجتي بنفسي، لكن ما يمنعش زي ما بيقول المثل أنا غنية وأحب الهدية، إن جوزي يدلعني ويجيب هدية حلوة، دي حاجة لطيفة
- الستات مش المفروض تجيب هدايا للرجالة، أنا لوحدي هدية، والرجالة المفروض تدلع الستات مش العكس، أنا أدلعك بطريقتي، ممكن مثلا أدلعك بإنك ترجع البيت تلاقني عاملة علشانك بيض بالبسطرمة، وده يبقى حدث لإني مش بطبخ.
- اللي يهد الجواز أو العلاقة أني أحس لحظة وأنا مع الراجل إنه مش شايفني أو مش حاسس بوجودي.
- جوزي الأخير كان عقرب، ومشكلة العقرب معايا إنه غامض وبيكذب كتير، ويعتبر كذبه نوع من الغموض
- ممكن أشوف بنت جميلة وأبص عليها، لكن بصة عن بصة تفرق، وفي نظرة معينة من الراجل ممكن تخليني أمشي، وعلشان كده مش بكمل في علاقة
- لو بيتنا كبير شوية، وفي مساحة إن كل واحد يبقى عنده أوضة بحمام لوحده، علشان نوحش بعض، بدل ما أصحيك الصبح وأفضل أرزع على الباب.
