مروة عبد المنعم: تامر حسني تخلى عني في أزمتي ومكنتش متخيلة أنها تيجي منه

كشفت الفنانة مروة عبد المنعم عن تعرضها لمحنة شديدة أبعدتها عن العمل لفترة لا تقل عن عامين، مما أدى إلى عدم قدرته على الصرف على بناتها، وكشفت أيضًا عن فنانين تخلوا عنها في أزمتها الأخيرة.

وانهارت مروة من البكاء بعد حديثها عن الأشخاص الذين تخلوا عنها في محنتها، وقالت مروة عبد المنعم خلال لقائها في برنامج "قعدة ستات":  كنت لسه بقول لبنتي مش عارفه أنا صرفت عليكم طول السنين اللي فاتت دي ازاي؟ بس بتمشي، أنا وقفت جمب نفسي محدش وقف جمبي، طبعا بعد ربنا، ربنا ده عظيم وكريم ، بقعد ساعات أقول أنا بصرف السنة دي ازاي.

وتابعت: أشرف زكي وقف معايا، وإدوارد كان وقتها معايا، وأحمد صفوت من الناس اللي وقفوا معايا، وأحمد زاهر وقف معايا في حاجات كتير جدًا، ودول اللي كانوا واقفين معايا، ومش هقول مين تخلى عني، وفي ناس استنيت إن هما يبقوا معايا ومزعلني أوي ومش عايزة أقول مين.

واستكملت: مكنوش صحابي أوي وعلى الأقل في بينا عشرة من الوسط الفني، ولما أقابلهم في لوكيشن بيقوليلي إيه الأخبار وبيسألوا عليا، وبقول الأسماء في الحاجة الكويسة.

وقالت: كنت متخيله إن تامر حسني يسأل عليا، وخاصًة كان لسه في عمر وسلمى حصله موقف في الجيش وروحتله مع إني لسه مكنتش صاحبته، والناس اللي بينا عشرة شغل فقط مسألوش عليا، إحنا مش عشرة خروج وفسح، وتامر من الناس القريبة مني، ومبعتش رسالة ولا كلمني.