ريم طارق: حسن شاكوش ما صرفش عليا جنيه.. وطلقني علشان عرفت سره

كشفت ريم طارق، تفاصيل طلاقها من زوجها مؤدي المهرجانات حسن شاكوش، مؤكدة أن مواقع التواصل الاجتماعي سببا من أسباب اشتعال الخلاف بين عائلتهما.

قالت «طارق»: «الأهالي ابتدوا يشيلوا من بعض بسبب التصريحات اللي بتطلع على السوشيال ميديا»، وذلك خلال حوارها ببرنامج 90 دقيقة، المعروض عبر قناة المحور، مساء اليوم الإثنين.

وأكدت أن أسرة شاكوش كانت رافضة مقابلة والدها في منزل عائلتها، متابعة: «كان عايزين يقابلوه بره على كافيه، عايزين يطلقوا على كافيه، بابا رد وقال لهم أنا عندي بيت، زي ما جيتوا وطلبوتها من البيت تيجوا وتعرفوني عيوب بنتي عشان لو عندها غلط أنا أربيها، ولو بنتي فيها عيب أنا هتنازل عن كل حاجة».

وأضافت «طارق»:«لما عرفوا إن عملت محضر إثبات حالة، حسن اتصل بيا وهددني وقالي إنتي بتعملي فيا محضر، وبتكتبي على السوشيال ميديا، السوشيال ميديا لعبتي أنا هتسلى عليكي إنتي وأهلك، خوفت شوية، ونزلوا صورنا وكتبوا كلام وحش، وقالوا عليا إن داخلة سبوبة وحسن ما صرفش عليا جنيه، ومفيش الأرقام اللي بيذكرها عن المؤخر».

وتابعت: «كل اللي بيعمله حسن شاكوش معايا، عشان سر أنا أعرفه عنه وحفظاه، وأنا هحفظه لنفسي، وهو سبب طلاقي، الزواج رباط بين البشر وميثاق غليظ، أنا وقفت معاه بكل الطرق، وكان عنده مشاكل كتير، وفي أخر أيامي معاه خليته يصلي وده كان مستبعد».