سارة التونسي عن تصريحات جمال العدل: «عيب على سنّك وتاريخك كمية الكذب اللي بتقوله»

ردت الفنانة سارة التونسي على المنتج جمال العدل، وذلك بعدما كشف الأخير عن تمردها عليه أثناء تصوير مسلسل  «حرب أهلية» وذلك خلال لقائه في برنامج حبر سري مع الإعلامية «أسما إبراهيم».

وقال العدل، :«أنه عقب نجاحها في مسلسل بـ "100 وش"، وكانت شاطرة جدًا، وكانت حلوة وملكة جمال، قرر أن يعيطها دور أقوى وأهم في مسلسل يسرا حرب أهلية».

مضيفًا: «تمردت على العمل وبدأت تتأخر بالساعات وبتيجي مش حافظة، واتخانقت مع باسل خياط وأنا جن جنوني، وبدأت تبقى بايخة مع زمايلها».

وقالت سارة التونسي في منشور لها عبر صفحتها الرسمية على موقع التواصل الاجتماعي «الفيس بوك»، قائلة: «أنا مكنتش عارفه إني مضايقة حضرتك أوي كدة، خصوصًا بعد ما أنا كسبت القضية ضد شركة العدل جروب وحضرتك خسرت قضيتك ضدي».

وأضافت: «بس ياااااه أنت لسه فاكر؟ ده عدى على الموضوع ده أكتر من سنتين و أنا والله نسيت الموضوع ( بس دي "والله" بجد مش زي بتاعتك) واشتغلت في بلدي و كسّرت الدنيا و لو عايزه أشتغل في مصر هشتغل، أصل مصر دي كبيرة أوي يعني أكبر من حضرتك و من أي حد. ولا ايه يا أستاذ جمال؟  مش انت إسمك كده برضه ؟ والله عيب على سنّك و تاريخك كمية الكذب الي انت كاذبها بخصوصي في اللقاء ده (بس مش تاريخك كله يعني)».

وتابعت: «وكمان حركة إنك نسيت الإسم دي تقلّل منك مش مني. بلاش أقولك شكلك كان عامل ازاي وانت بتحلف إنك نسيت الإسم. عملتها قبل كده في إعلام بلدي تونس و اترد عليك رد عظيم من المذيعة التونسية الي كانت بتحاور حضرتك، وعلى فكرة أنا مطلعتش برة مصر! أنا عندي بيت في مصر بزوره كل شهر تقريبا و بختار أشتغل ايه و مشتغلش ايه و أنا اخترت أركز في تونس و عملت بطولة مسلسل تونسي كسّر الدنيا السنة الي فاتت و الإعلام العربي كلّه اتكلّم عنه و يمكن عشان كده حضرتك افتكرتني تاني فجأة ( ده لو كنت أصلا عرفت تنسى الدّرس)  و إن شاء الله هيكسّر الدنيا في الجزء التاني السنه دي».

واستكملت خلال منشورها: «أنا أكبر من إني أشتغل أي عمل و خلاص عشان بس أقول أنا موجودة. و ده من زمان و انت عارف ده كويس واتكلمنا فيه لمّا حضرتك طلبت تقابلني في مكتبك عشان كنت عايز تمضي معايا عقد بـ٣ سنين بعد ما نجحت في دور شيرين في مسلسل "بـ١٠٠ وش" بأمارة ما قلتلي "أنا محتاج روح جديدة و دم جديد عشان الي عندي في الشركة كبروا خلاص"  و قلت كلام تاني كتير عنهم في غيابهم.. ولا نسيت دي كمان؟».

وأوضحت: «ويومها أنا قلت لنفسي الي يتكلم كده عن ناس اشتغلوا معاه سنين، يخوّف. و رفضت أمضي مع حضرتك العقد ده يا أستاذ يا الي ناسي إسمي، أنا عندي كلام كتير و خطير ممكن أقوله بخصوص حضرتك و بخصوص الي انت قلته في برنامج حبر سري - Hebr Serry، بس للأسف عندي تصوير و مش فاضية. و كمان حزني على الي بيحصل في العالم مخليني مستتفهة كل الحاجات دي».

ووجهت الشكر لمتابعها، قائلة: «شكرًا لكل متابعيني الي بعتولي الفيديو. أصلي أكيد مش متابعة و مفيش سبب يخليني أتابع حلقة بتستضيف شخص أنا أعرف عنه كتير بس اخترت أسكت و مطلعش في الإعلام و أخلي القضاء يقول كلمته و قالها الحمد لله، حضرتك ولا اتعظت من عقاب ربنا وقتها بإن كل استديوهات و مخازن العدل جروب اتحرقت و لا اتعظت من إنك خسرت القضية و أنا الي كسبت الحمد لله ولا اتعظت من الي بيحصل الأيام دي .. مش عارفه أقولك ايه والله و بصراحة ولا عندي وقت أقول أصلا».

اقرأ أيضًا: لطيفة عن «القمة العربية الإسلامية»: «عندي أمل اليوم في حل لأزمة العدوان على غزة»