رانيا فريد شوقي تكشف تفاصيل نظرة الوداع الأخيرة على شقيقتها ناهد

وجهت الفنانة رانيا فريد شوقي، رسالة مؤثرة لشقيقتها الراحلة المنتجة فريد شوقي، التى رحلت عن عالمنا منذ يومين، ووصف رانيا في رسالتها مشاعر افتقادها لشقيقتها ولحظة إلقاء نظرة الوداع عليها.

وقالت رانيا، عبر حسابها الرسمي على فيسبوك: "للأسف بنعتاد الأحباب في حياتنا كأنهم خالدين في الدنيا زي ما نعتاد النعم كأنها مستمرة إلي الأبد وده من عيوب البشر".

وأضافت: "أختي الحبيبة الغالية ناهد انا بعتذر لك لأني اعتدك في حياتي يمكن خيالي كان اضعف من إني اتصور فراقك يمكن خدتنا مشحانات الدنيا وربنا نور بصيرتنا ورجعنا لحضن بعض والحب اللي اتربينا عليه وحبنا لبابا كان دايما بيجمعنا يمكن لأني تنسيت اننا بنكبر كلنا ولينا عمر بيخلص يمكن لأني جيت الدنيا لقيتك أختي الكبيرة القوية العنيدة اللي ماتعرفش حاجة اسمها استسلام وارادتها من حديد".

وتابعت: "قوتك كانت بطمني عليكي انا مش عارفه انا بكتب ايه بس اللي حساه اكبر بكتير من أي كلام مازلت مش مستوعبه ولما حد بيقول الله يرحمها بتخض في الفترة الأخيرة كنت بشوف فيكي بابا بكل حركاته وطريقة كلامه ونظراته وهزارك وقولت للاحفاد اللي ماشفوش جدهم ناهد بقت نسخه من جدكم لما تشفوها كأنكم شفتوه سبحان الله".

واستكملت: "والغريب اني من الشخصيات اللي بتخاف تدخل علي حد متوفي لانه بيبقي آخر انطباع بيفضل في الذاكره عن الشخص لكن لما دخلت وشوفت وشك مبتسمه كأنك نايمة وبتحلمي حلم جميل حسيت انك شوفتي فريد ابنك بيستقبلك وخدك لحبايبك بابا وطنط هدي ومها أختنا ده تفسيري لابتسامتك الهادية الجميلة الواضحة اوي اللي هونت علينا كلنا فراقك واللي مش هتفارقني اللي باقي من عمري".

واختتمت: "كنتي راضية بكل اقدار الله ومسلمه أمرك لله إلي ان نلتقي يا اختي سلميلي علي بابا وقوليله الحياة من غيرك مش حياة ونفسي يجيلي في الحلم بقاله فترة غايب عني هتوحشيني اوي يا حته من ابويا و من قلبي".