هشام ماجد: عمري ما عملت مصلحة من الكتب الدراسية.. دي فلوس حرام

تحدث النجم هشام ماجد عن ذكرياته أيام المدرسة، قائلا: "كنت في مدرسة بميدان الرماية وبيتي في المهندسين، وكان ده كابوس بالنسبة لي، وأنا في المدرسة مكنش فيه لا محور بقى، كنت باخد شارع فيصل كله، وباص المدرسة كان يشبه أوتوبيس النقل العام الكبير، ويدخل شارع البيت عندي الصغير، وكل يوم خناقة بين سائق الأوتوبيس والجيران، في عز الحر الساعة 4 العصر".

وأضاف هشام ماجد، خلال حضوره ضيفا على بودكاست "فايق ورايق X ابراهيم فايق": كنت أرجع من المدرسة متأخر وأروح بدري، ومكنش فيه تكييف، مكنش عندنا إن ننط من المدرسة، السور كان عالي أوي، والمدرسة كانت مؤدبة شوية عن كده، والحاجات دي ما فيهاش هزار، اللي هيعمل كده هيروح ومش هيرجع تاني.

وتابع: أنا بردو مكنتش شخصية الطالب الشقي اللي بيزوغ وأنط من السور، مرة مثلا زوغت من المدرسة، إني مركبتش الباص الصبح، نزلت من البيت عادي بس مركبتش الأتوبيس، وحضرت ماتش الزمالك، ولا زوغت من الدروس للعب، كنت شخص هادي وملتزم ومش بتاع الحاجات دي، مضربش فلوس الدروس في جيبي، ممكن نخلص الدرس ونروح نلعب، الدرس يتلغي فنخرج وما نقولش، وعمري ما عملت مصلحة في فلوس الكتب الدراسية.. دي فلوس حرام.