هنا الزاهد: «كان نفسي أحس بمشاعر الأب.. وطلعت زكريا كان بيعاملني زي بنته»

كشفت الفنانة هنا الزاهد، عن تفاصيل علاقتها بوالدها لأول مرة، وافتقادها لوجوده في حياتها، رغم أنه موجود على قيد الحياة.

وقالت هنا الزاهد خلال استضافتها في برنامج "صاحبة السعادة"، الذي تقدمه الفنانة إسعاد يونس عبر قناة dmc: "ناس كتير فاكرة إن بابا مش موجود، هو موجود وكان في فرحي، بس هو مش قريب، وسبب من أسباب خوفي من إني أغلط إني كنت خايفة لو جالي استدعاء ولي أمر ماما تيجي وأنا عايزة بابا ييجي".

وأضافت: "لما كنت في فرح بنت صلاح عبد الله شوفت أب بيعيط بحرقة على بنته ومبسوط بيها، ووقفت على جنب أعيط، وكان إحساس عمري ما حسيته ونفسي أحسه".

أوضحت هنا الزاهد أن علاقتها بوالدها ليست سيئة قائلة: "بابا إنسان كويس جدا، وعنده أسرة ثانية ربنا يخليهم له ويخليه ليا، لكن افتقدت أوي مشاعر الأب ومعرفش يعني إيه أب، والله يرحمه طلعت زكريا كان بيعاملني زي بنته وملا الحتة دي لكن مش 100%".

وتابعت: "طلعت زكريا كان مثلا يقعد مع بنته أميمة وتقعد على حجره، وطبعا هي بنته ونور عينيه، لكن كنت أبص عليهم وأغير وأقول يا بختها، هو طبعا كان نعم الراجل وعاش مع ماما كتير وإنسان مفيش زيه".

وأشارت هنا الزاهد إلى أن افتقادها وجود الأب أثر على اختيار شريك حياتها بقولها: "علشان كده معرفش أحب حد في سني، بحس إنهم إخواتي وأنا عايزة حد يحتويني ويبقى ظهر وسند وأبقى حاسة بالأمان، وكان نفسي لما أحب أروح لبابا أقول له، هو هيبقى فاهم أكتر مني".

اقرأ أيضا: أول تعليق من خطيبة مسلم على انفصالهما: مفيش تفاهم بينا ومشاكلنا صعبة