نيللي كريم عن كواليس "ذات": جالي اكتئاب بسبب شكلي.. وبحب أسافر بعد التصوير علشان أتخلص من الشخصية

تحدثت الفنانة نيللي كريم عن تأثير بعض الأدوار عليها منها مسلسل "ذات" و"سجن النسا".

وقالت نيللي كريم خلال حلقة نقاشية بعنوان "علاقة الدراما بالمجتمع والجمهور" :لما كنت بعمل مسلسل "بنت اسمها ذات" كان في مراحل عمرية والمسلسل دا لظروف ما قعدنا نصورة لفترة طويلة وصلت لستين، انا كنت بتشغل وبصور ومش واخدة بالي في يوم كنت بلبس حاجات عشان أزود وزني وأنا رايحة الاستديو لمحت مراية وأنا عادة بلبس بسرعة ومش باخد بالي، بصيت في المراية قلت هي مين دي قربت أكتر اتخضيت ورجعت الأوضة وبتديت أعيط".

وتابعت نيللي كريم: "الأستاذة كاملة المخرجة جاتلي وسألتني وأقولها مش عارفة، أنا اكتئبت وعيطت وحسيت إن دا مش أنا، طلبت مني أروّح ولأول مرة فركشت التصوير في حياتي، روحت البيت ولبست الجينز بتاعي عشان أتأكد إن مقاسي هو نفسه مش زي الست اللي شفتها في المراية وخرجت عشان أرجع لنفسي".

وتذكرت نيللي كريم موقفا آخر: "وقت تصوير مسلسل "سجن النسا" شخصية "غالية" كانت صعبة، في مرة خرجت قابلت واحد صديقي سألني مالك قلت له مفيش، بعد فترة شفت صوري معته ووقتها كان تصوير المسلسل لقيت شكلي زي غالية، أنا بعد التصوير باخد وقت وبتأثر وبحب أسافر مثلا شهر اتخلص من الشخصية ولو في هدوم أو إكسسوار بتخلص منها".

وتحدث خلال الحلقة النقاشية إلى جانب نيللي كريم الفنان يوسف الشريف، والمخرج كريم الشناوي، وشريف عبد المسيح، وسلمى الفوال، وأدار الحوار مينا النجار.

وحضرها عدد من النجوم منهم: أحمد داود، وعلا رشدي، وأمينة خليل، وصبري فواز، غيرهم.