في آخر ظهور له قبل وفاته.. عادل الفار: غلطت في تربية ابني.. وحاسس إني مذنب

تصدر الفنان عادل الفار محركات البحث، بعد وفاته صباح اليوم الجمعة، عن عمر يناهز 63 سنة، فأعاد الجمهور نشر لقاءاته الأخيرة، لاسيما آخر ظهور له في برنامج «كلام الناس» الذي تقدمه ياسمين عز، وتأثره الشديد خلال حديثه عن نجله المتوفي.

عادل الفار يوجه نصيحة للآباء

وأثناء حديثه عن وفاة نجله خلال ظهوره في إحدى حلقات البرنامج في وقت سابق من الشهر الجاري، وجه الفنان نصيحة للآباء بآلا ينساقوا وراء طلبات أبنائهم خاصة عند طلب الأموال، وضرورة السؤال عن فيما سيتم توجيه تلك الأموال، قائلًا:«اصحوا يا أبهات، أنا عايز أديكوا نصيحة اهتم بابنك بس مش لدرجة اللي عايزه تديهوله، لا.. لازم تقعد وتعرف هو ماشي إزاي»، مُضيفًا: «دي أنا غلطت فيها وندمان عليها من ساعتها، فاتمنى انهم يهتموا بأولادهم ويقعد معاه ويعرف هو ماشي إزاي».

وأوضح الفار: «أنا كان أي فلوس يطلبها أديهاله، ماسألوش عنها، وكان بياخد فلوس كتير، دي الغلطة اليل انا وقعت فيها، لغاية ما اكتشفت أنه هو بياخد مخدرات»، متابعًا: «في الوقت ده كنت بشتغل كتير، وكان شاغلني، لان أنا بحب شغلي قوي، فكنت على طول تايه في شغلي، واللي هو عايزه بديهوله، لغاية ما اكتشفت الغلطة الكبيرة دي».

عادل الفار عن وفاة ابنه: حاسس إني مذنب

وأوضح الفنان عادل الفار أن عدم متابعته لنجله وسؤاله عن أوجه صرف الأموال التي كان يحصل عليها منه، كانت «غلطة»، لأنه لم يهتم إلا في المرحلة الآخيرة عند دخول نجله «المصحة» وبدء رحلات العلاج لذلك يجب على الأباء متابعة أبناءهم جيدًا، مُضيفًا: «كان يخرج من المصحة يتعب فيدخل تاني، لغاية لما ربنا افتكره، بس أنا حاسس أن أنا مذنب».

وتابع: «بقول للأبهات انتبهوا لأولادكم، شوفوا رايح فين وبيصرف منين وبيعمل أيه، ماتتشغلش بشغلك وتسيبه يمشي على كيفه»، منوهًا إلى أنه قبل وفاته ارسل له رسالة محتواها: «حبيبي يا بابا.. ماتزعلش مني.. أنا بحبك».