كوني المرأة التي حين تحضر.. يصمت المكان لهيبتها
كتب: داليا حسام
المرأة مش بس ملامح ولا لبس شيك، دي طاقة وحضور وذوق وطريقة في الكلام والمشي والضحكة. الست اللي عندها وعي بجمالها الداخلي قبل الخارجي، بتكون دايمًا مختلفة
لما تدخل أي مكان، مش بتحتاج تعلن عن نفسها، لأن حضورها وحده بيكفي الناس بتحس براحتها وبتنجذب لأسلوبها، وبتفضل فاكرة تفاصيلها الصغيرة نبرة صوتها، ريحتهاطريقة كلامها، ضحكتها الصافية.
هنتكلم إزاي الست تقدر تخلق هالة خاصة حواليها، تخلي وجودها دايمًا مرغوب، محترم، ومحبوب. من الأناقة للمشية ومن الكلام للروح. كل تفصيلة ليها تأثير، وكل حضور ليه حكاية.
فيه ستات ما بيبقوش مجرد ناس وسط الزحمة، دول حالة. حضورهم له موسيقى خاصة وهدوء معين، وكأن وجودهم بيخلّي الدنيا تهدى وتروق.
مش لازم تكوني الأجمل، لكن ممكن تبقي الألطف، الأرق، والأكثر تأثيرًا.
سرّك في لمعة عنيكي، في كلمة حلوة طالعة من قلبك، وفي خطواتك اللي فيها وقار وأنوثة.
في طريقتك في السلام، في اختيارك لكلمة "شكرًا"، في إنك تسمعي أكتر ما تتكلمي، وفي إنك لما تتكلمي، صوتك يطمن.
أناقتك مش بس فستان شيك ولا شنطة غالية، دي احترامك لنفسك، وترتيبك اللي بيحكي عن ذوقك من قبل ما تنطقي.
عطرك اللي بيمرّ بهدوء، ويلفّ حوالين المكان، ويفضل فايت في الذاكرة.. ريحة بتفكر الناس بيكي حتى لو ماكنتيش موجودة.
فيه تفاصيل صغيرة الناس بتشوفها كبيرة.. زي ضحكتك اللي طالعة من قلب راضي، زي رد فعلك الهادي، زي اختيارك إنك تكوني دايمًا أنتِ.. من غير تصنّع.
المرأة اللي بتحب نفسها صح، بتعرف تحب اللي حواليها ببساطة. مش محتاجة تنافس حد، ولا تقلّد حد، لأن ثقتها بنفسها مصدرها من جوّا، مش من برّا.
لما تمشي من المكان، تسيب أثر.. ريحة حلوة، ذكرى أحن، وابتسامة متعلقة في الهوا.
في كل مرة تدخلي فيها مكان، افتكري إنك مش بس ضيفة.. إنتِ بهجة، ونسمة، ونور، وروح بتعرف تخلّي الدنيا أحلى.
في عالم بيجري بسرعة، وناس كتير بتنسى نفسها في الزحمة، كوني إنتِ المختلفه.
اللي حضورها راقٍ، وكلامها دافي، وروحها ساكنة بس ليها صدى.
خليكي النور اللي يطمن، والبهجة اللي تترّك، والبصمة اللي ما تتنساش.
اهتمي بنفسك، بحضورك، بطريقة مشيتك، بنظرة عنيكي، وباختياراتك الصغيرة اللي بتصنعك كل يوم.
ومهما تغيّر حواليكي، افتكري إن سر الجمال الحقيقي بيبدأ من جوّا. من قلب نضيف، ونية صافية، وروح حنونة بتعرف تحب الدنيا بطريقتها.
كوني دايمًا النسخة الأجمل من نفسك، مش علشان الناس. لكن علشانك إنتِ، علشان تستاهلي.
