"يتعاقب بس ما يتجلدش".. ابنة سامي العدل تعلق على حكم تأييد إيداع نجل محمد رمضان في دار رعاية
كتب: نسرين إبراهيم
علقت رشا ابنة الفنان سامي العدل، على حكم تأييد إيداع نجل محمد رمضان في دار رعاية، بعد إدانته بالاعتداء على طفل داخل نادٍ شهير.
وكتبت رشا سامي العدل: "رأيي اللي مخالف لكثيرون، وبعيدا عن محمد رمضان اتفقنا أو اختلفنا معاه، الطفل مالوش أي ذنب يتعاقب بالشدة دي خصوصا أنه اتربى في مستوي اجتماعي مختلف تماما، ناس هاتقول مش متربي هو برضه مش هايتربي في دار رعاية".
وأضافت: "مع كامل احترامي للحكم ولكن الأولى والأحسن يتعمل حملة زي حملة البلوجرز يلموا بقى.. أطفال السنج والمطاوي اللي بيشربوا سجاير وكوللة وماحدش عارف يسيطر عليهم اللي مبدورين زي الرز في شوارع مصر وحملة تانية على سواقين الموتوسيكلات اللي بينتشوا الشنط والموبايلات وسواقين الميكروباصات والتكاتك اللي بيبلطجوا على لشعب طول ما هما ماشين في الطريق وأوحش الألفاظ في كل المواقف والشوارع علشان دول بيخدشوا الحياء العام وبيتسببوا في كوارث مش بس يوميا وإنما كل دقيقة و ثانية"
وتابعت: "ماعنديش مشكلة يعاقبوا ابن محمد رمضان بس يرحموا الطفل مش يجلدوه بقسوة طفل اتربى على الدلع في بيت مرفة وكل حاجة متاحة مايتحرمش من كل حاجة ومن اهله وبيته ومدرسته وصحابه و قولوا هايتصلح ده هايتدمر، حطوه في برنامج تأهيل إصلاح محترم يتناسب مع حالته بمراقبة من المحكمة وهو في وسط أهله اللي مش هايقصروا ويجيبوا أحسن دكاترة تعديل سلوك لو أمر محكمة وفي نفس الوقت لموا أطفال الشوارع واودعوهم دور رعاية علشان أغلبهم أهلهم أصلا رموهم في الشارع ومحتاجين ده".
واختتمت رشا سامي الهدل حديثها قائلة: "أنا آسفة بس اتفق أو اختلف مع محمد رمضان دي حاجة وأن طفل مستقبله كله يضيع ويتدمر نفسيا ويكبر وتكبر جواه عقد وكلاكيع يعاني ويخلي غيره يعاني بعدين ده مش حل واقعي ابدا".
