آمال ماهر: وفاة والدي كانت أصعب فترة في حياتي.. وفي آخر أيامه نسي الكل إلا أنا

تحدثت النجمة آمال ماهر، عن وفاة والدها لأول مرة، من خلال حلولها ضيفة على برنامج «عندي سؤال» الذي يقدمه الإعلامي اللبناني محمد قيس عبر قناة «المشهد».

وقالت آمال ماهر:«لو كان والدي على قيد الحياة، كانت حاجات كتير اتغيرت في حياتي، لأن الأب بالنسبة للبنت ضهر وسند مر عليا وقت صعب جدًا، خصوصًا بعد وفاة والدي وعمتي، وكانت وفاتهم ورا بعض، ودي كانت من أصعب الفترات اللي عدّت عليا قبل وفاة والدي، حسيت إن ربنا بيهيأني، وده كان في شهر يناير 2016».

وأضافت:«كنت حلمت حلم غريب، وصحيت الفجر على تليفون من أخويا بيقولي والدك عايزك، جريت على طول وأنا مش قادرة أتنفس من كتر الخوف، ولما وصلت لقيته تعبان شوية، بعد كده سألت عن معنى الحلم، وقالولي إن اللي يشوف الحلم ده والده هيتوفى دخلت في حالة اكتئاب حاد، وقعدت شهرين قافلة على نفسي، ومكنتش برد على حد».

وتابعت:«في أول مارس، جالي تليفون تاني، وروحنا المستشفى وأخدنا والدي، ودخل في غيبوبة وهو في حضني كانت أيام صعبة جدًا، كنا في دوامة».

واختتمت آمال ماهر حديثها وهي تبكي قائلة:«الحاجة اللي عمري ما هنساها، إن في آخر أيامه مكنش بيعرف حد غيري، المرض خلاه ينسى كل الناس، لكنه كان بينادي اسمي وفي آخر يوم اتكلم فيه، كان بيناديني واللحظة اللي توفى فيها، كانت نفس الصورة اللي شفتها في الحلم، وتوفى أول يوم العيد».