باسم سمرة: مش بسمع أغاني محمد رمضان.. وبحب ويجز وبحترم موقفه الوطني

تحدث الفنان باسم سمرة عن رؤيته للساحة الفنية الحالية، وكشف رأيه في تجارب بعض النجوم في الغناء، كما تطرق لعلاقته بزملائه في الوسط الفني وأهمية روح الحب والتعاون بين فريق العمل.

وقال باسم سمرة: «دلوقتي الفنان بقى ممكن يمثل وينتج ويخرج ويغني كمان، ولو هو شاطر وعنده الموهبة فعلًا، يا ريت يعمل ده. بس الحقيقة إن مش أي حد يقدر يشيل كل الحكاية دي لوحده».

وأضاف: «محمد رمضان نجم وموهوب وناجح جدًا، وأغانيه بتعمل ملايين المشاهدات، والناس بتحبها وبتسمعها. إنما أنا بصراحة مش بسمع له كتير، ومش فاهم كلمات أغانيه أحيانًا، ومش مركز معاها».

وتابع: «الجيل الجديد، مواليد 2000 و2005، عندهم ثقافة ورؤية مختلفة خالص، وممكن محمد رمضان يكون بيخاطب الجيل ده وبيشد الجمهور الصغير ناحيته. إنما أنا مش مقتنع بفكرة نمبر وان والحاجات دي، ومش ببسط وأنا بسمع أغانيه».

وعن ذائقته الموسيقية، قال: «أنا بحب الراب جدًا، وبحب ويجز، شايفه لذيذ وبفهمه، وبيقدم كلام حلو وعنده موقف وطني، وده شيء يخليني أحبه وأحترمه».

كما أكد باسم سمرة على علاقته الطيبة بزملائه، قائلًا: «أنا بحب كل زمايلي في الوسط الفني، وكلهم أصحابي بلا استثناء. بحب هاني سلامة وأحمد مكي وعمرو سعد ومحمد إمام وكريم عبدالعزيز، وكلهم حبايبي».

واختتم حديثه قائلًا: «الحب اللي بين التيم بيظهر على الشاشة وبيوصل للجمهور. النجاح مش لازم ييجي على حساب قهر أو إهانة حد. لما فريق العمل يكون بيحب بعض فعلًا، ده بيبان ويدي طاقة إيجابية، والمشاهد دايمًا بيحس بده وبيقدر الشغل الجماعي أكتر من أي نجاح فردي».