سيد علي ينتقد انشغال السوشيال ميديا بأخبار الفنانين: الناس الغلابة مش لاقية تجيب مروحة

انتقد الإعلامي سيد علي انشغال مواقع التواصل الاجتماعي بأخبار الفنانين وأحداث الساحل الشمالي، في الوقت الذي يواجه فيه المواطنون أزمات أكثر أهمية، خاصة مع موجة الحر الشديدة التي تشهدها البلاد.

وقال سيد علي، خلال تقديمه برنامج «حضرة المواطن» المذاع على قناة «الحدث اليوم»: «ربنا يكون في عون الناس الغلابة اللي ما عندهمش مراوح ولا تكييف.. إحنا ربنا مدينا نعم كتير جدًا وبنتبسط وقاعدين نشتكي، بقى عمرو دياب مش عارف عمل إيه، وقاعدين بيحللوا لي عمرو دياب، وتامر حسني بيعمل إيه، والساحل الشرير.. في ناس غلابة مش قادرة تجيب مروحة علشان الجو اللي إحنا فيه، وإحنا هايصين في الهيصة».

وأضاف: «هل هو ده اللي يشغل الرأي العام في مصر؟ الدنيا مولعة، والراجل ترامب مش عارف هيعمل إيه، والحوثيين، والبحر الأحمر، والديون اللي علينا، والجو، والأزمة الاقتصادية، وإنتوا قاعدين تكلموني في عمرو دياب وتامر حسني ومراسي.. في إيه يا جماعة؟».

وأشار سيد علي إلى معاناة البسطاء الذين يعملون تحت أشعة الشمس، قائلًا: «وأنا جاي مدينة الإنتاج الإعلامي في ولاد واقفين في الشارع في الحر ده، في الشمس دي، بيعملوا ذرة مشوية وبيقشروا تين عشان آخر اليوم يروح مثلًا كسبان 200 جنيه».

سيد علي يدعو إلى مساعدة المواطنين في موجة الحر

ودعا الإعلامي إلى مساعدة المواطنين الذين يعملون في الشوارع خلال موجة الحر، مضيفًا: «أنا نفسي إن حد يكون في قلبه ذرة من الرحمة.. يجيب ألف كاب ويمشي على الشارع يدي للناس الغلابة اللي واقفة تحت الشمس، وكل واحد فينا ينزل يحط من 5 لـ10 إزازات مية في الفريزر، وهو نازل يحطهم في شنطة، وهو ماشي يديهم للناس، ده أضعف الإيمان».

كما وجه سيد علي التحية إلى رجال القوات المسلحة والشرطة، قائلًا: «في جنودنا في القوات المسلحة والشرطة واقفين على حدود بيحموك، وما حدش فيهم بيشتكي، ولا حد فيهم بيقول أي كلمة.. حد من السوشيال ميديا افتكرهم؟ حد يقدر يقف مكانهم نص ساعة؟».

واختتم سيد علي تصريحاته بالتأكيد على ضرورة عدم ترك تشكيل الرأي العام لما وصفه باللجان الإلكترونية والحملات الدعائية، قائلًا: «مؤسسات منضبطة، إنما الرأي العام إنه يتشكل عن طريق تلك اللجان.. والناس تمشي وراهم.. في إيه؟ دعاية فجة والناس بتصدقها».