كمال عطية يروي معاناته مع تأخر الإنجاب: "شبه كل الناس بحلم بحتة عيل"

حرص الفنان كمال عطية على مشاركة جمهوره بتجربته الإنسانية مع تأخر الإنجاب، وذلك بالتزامن مع الاحتفال بعيد ميلاد نجله، عبر منشور مطوّل نشره على حسابه الرسمي بموقع «فيسبوك».

تجربة كمال عطية مع تأخر الإنجاب

وتحدث كمال عطية عن رحلته قائلاً: "استنيت سنين كتير عشان اكتب البوست ده، اتجوزت سنة 2006، وشبه كل الناس تقريبا بحلم بحتة عيل افرح بيه واربيه واتسند عليه لما أكبر... وأنا أساسا من الناس اللى بتحب الأطفال... المهم بدأت الشهور تعدى ولسه مافيش أى حمل... وبدأت اقلق زى أى كائن حي... وبقيت بتضايق جدا من سؤال الناس ليا أو لمراتى: ايه مافيش حاجة جاية في السكة كده؟... وكأن الموضوع بإدينا واحنا اللى مش عايزين".

وأضاف: "بدأنا نروح لدكاترة... وأى حد يقولنا على دكتور نروحله... وبدأت السنين تعدى وزاد القلق... وكمان زاد الضيق من أسئلة الناس... خصوصا إن الكلام بقي بيضايق... يعنى يجى حد ويقولك إدعى ربنا كتير واتذلل له وعيط وانت بتدعى؟ كنت ببقي عايز أرد عليه وأقوله ومين قالك إنى مابعيطش كل يوم؟".

بعد انتظار 10 سنوات

واستكمل كمال عطية حديثه: "مش هطول عليكم 10 سنين... ووالله خلال العشر سنين دول كنت راضى جدا بقضاء ربنا وقدره... وعمرى ما اعترضت لحظة واحدة... وكان دايما عندى إحساس إن ربنا هيدينا فى التوقيت اللى هو شايفه... لكنى بشر برضو بحزن زى أى إنسان".

وتابع: "لحد ما قالتلى واحدة صديقة على دكتور... وروحناله... وقال إن مافيش أى موانع... لكنه اقترح نعمل منظار... واكتشف زايدة لحمية دقيقة جدا... وشالها... وقال مش هنعمل تخصيب دلوقتى، نستنى 6 شهور... وبالفعل بعد شهر واحد بس ربنا كرمنا ومراتى حملت بشكل طبيعى".

وأضاف: "ويوم 9 أغسطس 2016 ربنا رزقنا بعبد الله كمال عطية".

رسالة إنسانية

واختتم كمال عطية منشوره موضحًا سبب مشاركته لهذه التجربة: "أنا ليه كاتب البوست الطويل ده؟ لسببين: الأول إرمى كل حمولك على الله... لأن توقيته هيكون أحسن ألف مرة من توقيتك... ثانيا بلاش نتدخل فى شئون الناس وخصوصا الحساسة منها... إلا لو فعلا تقدر تساعد... غير كده ماتتكلمش إلا لو الشخص نفسه حب يفضفض".