أيمن بهجت قمر يدعم فارس: كان حلم بالنسبالي ووش السعد عليا

أعرب الشاعر والسيناريست أيمن بهجت قمر، عن سعادته الشديدة بعودة الفنان فارس للغناء من جديد بعد فترة من الغياب.

وحرص قمر، على دعمه من خلال حسابه الرسمي على فيسبوك، قائلا: «فارس هو أول نجم اشتغل معاه في سنة ٩٣ في شريط سوسنه بأغنية شاغلني من ألحان حسن دنيا وتوزيع طارق مدكور وإنتاج طارق عبد الله، كنت عيل صغير في ثانوي، وكان فارس حلم بالنسبالي وإني اسمع كلامي وهو بيغنيه ولما ده حصل كان وش السعد عليا، وإداني دفعة كبيرة أوي، وآمن بموهبتي مبروك رجوعك يا فارس كلنا سعداء بده».

وكان قد أكد المطرب فارس أن السوق الغنائي تغير كثيرًا في السنوات الماضية، ولم يعد به مؤشرات أو معايير نجاح ثابتة.

وقال فارس لـ"العاصمة": "الأمور والمسائل اتغيرت، وبقى معطيات جديدة ولما بعدت في الفترة الأخيرة بقى فيه تنوع في الأغاني، يعني فيه حاجات جيدة وحاجات دون المستوى، وسألت نفسى لما أرجع هغني إيه؟ فأول ما بدأت لما اتعرض عليا "عصبي" لقيتها في نفس سكة "بحبك وبموت فيك" اللي لحد وقتنا هذا ناجحة".

وتابع: "فغيرنا بقى وعملنا أغنية "روجي ك"، بس لسه موصلتش للناس الآلية اختلفت حاليًا، زمان كنا بنعمل "كاسيت" أو "سي دي" كان الجمهور بيروح يشتريه بنفسه فبيلاقي ألف "كاسيت" فبيختار اللي هو عايزه ويدفع فلوسه، دلوقت "التريند" بيتصنع والزن بيجيب نتيجة "التيك توك، مضيفًا: "فالدنيا اتغيرت وشايف أن زمان كان الموضوع "فير" أكتر".