«هات 10 ملايين جنيه وأرخصلك».. أقوال الشاهد الأول في قضية «رشوة وزارة الصحة»

تواصل محكمة جنايات القاهرة المنعقدة بالتجمع الخامس، اليوم الإثنين، ثاني جلسات محاكمة 4 متهمين في قضية "رشوة وزارة الصحة".

وقال الشاهد الأول، بصفته شريك في المستشفى: "أنا لما حصل عدم تشغيل المستشفى ذهبت وحكيت لواحد قريبي وقولتله إن إدارة العلاج الحرج مش راضية تديني ترخيص المستشفى، فقال لي: أنا أعرف حد ممكن يساعدنا في الموضوع ده".

وأضاف: "بعدها عرفني قريبي بواحد اسمه حسام فودة اللي هو المتهم الثالث وقالي إنه يعرف حد هيساعدنا في الموضوع وبعدها اتقابلنا تاني يوم، وبعدها أنا حكيت لحسام فودة على المشاكل اللي بنواجهها مع العلاج الحر بشأن تشغيل المستشفى وهو قالي هعرفك على الدكتور سيد الفيومي وإنه هيساعدنا".

وتابع: "في يوم 9/19 كلمني حسام فودة وقالي اننا هنتقابل مع الدكتور سيد الفيومي، وبعدها اتقابلنا بالفعل في مطعم بالقاهرة الجديدة، وجدت خلالها الدكتور سيد وحسام فودة وسألني المتهم الثاني اللي هو سيد الفيومي وحكتله على المشكلة".

وأكمل الشاهد الأول حديثه: "هنا أخبرني المتهم الثاني اللي هو سيد الفيومي وقالي إنه في حد مهم يعرف ناس في وزارة الصحة وهيخلص الموضوع وبعدها بنص ساعة حضر المتهم محمد الأشهب وجلس في المقعد المجاور وقالي: ايه المشاكل، أخبرته بالمشاكل اللي باعنيها من إدارة التراخيص ووعدني انه هيخلص المشاكل دي كلها، وبعد ما أنهيت كلامي مع المتهم محمد الأشهب، اتعشينا في المطعم ووعدني إنه هيساعدني".

واستطرد: "بعدما خرجت من المطعم بصحبة محمد الأشهب وسلمت عليه بحرارة وشكرته هنا حضر المتهم الثالث حسام فوة وقالي: الحجات دي مش بتخلص بالسلامات والأحضان".

واختتم شهادته: "حسام فودة رفع إيده الإثنين وشاور بعشر أصابع وقال لي: المطلوب 10 مليون جنيه عشان موضوعك يخلص ده لو كنت عايز الترخيص في تلك اللحظة كان عندي ذهول من المبلغ وأخبرته إنه معايا شركاء هرجع ليهم وهبلغ حضرتك".