تامر فرج يهاجم صناع الفن: ممكن أمثل عشان موهوب مش عشان عندي فلورز

علق الفنان تامر فرج، على عدم مشاركته في أعمال فنية خلال الفترة الماضية ما أصابه بالاستياء تجاه ذلك.

ونشر تامر فرج عبر حسابه بموقع التواصل الاجتماعي، فيس بوك، منشور قال فيه:" البوست ده مش حالة اكتئاب ولا يأس ولا انهزامية خالص.. هو مجموعة أسئلة أرجو أنها توصل للقائمين على صناعة الدراما والسينما والفن في البلد وبره البلد، وحد يتكرم مشكورًا بالرد عليها".

وأضاف: "الحمد لله الناس كلها بتقول لي أن أنا موهوب وعندي كاريزما، ومش عارف إيه وبيحيونى على أدائي وتمثيلي وشواهد كتير بتقول إني بعرف أمثل.. واللي يقهر السؤال اللي مش عارف ليه يتوجه لي أنا لما بيقولوا لي أنت ليه مقل في أعمالك؟؟ ده إحنا بننتظر مشاهدك وشغلك.. أو أنت ليه ما بتعملش سينما؟؟.. أو أنت إزاى مابتاخدش مساحات أكبر من كده؟؟.. زي ما يكون أنا اللي مابشتغلش بمزاجي.. والأسئلة اللي بطرحها للمنتجين والمخرجين".

واستكمل: "أنا اسمى تامر فرج ممثل وسيناريست.. هل ممكن أمثل أو أكتب عشان أنا موهوب فقط مش عشان عندي عدد فولورز كتير على السوشيال ميديا؟؟؟.. هل ممكن أمثل أو اكتب بموهبتي وأنا راجل مابحبش أتنطط في خروجات وكافيهات وسهرات وتجمعات وبفضل إني اقعد فى بيتي مع أسرتي اكتب واشتغل على نفسى في التمثيل؟؟.. هل ممكن أمثل أو اكتب بموهبتى من غير ما اتلزق فى مهرجانات وحفلات لأنى مابحبش اروح أي حدث فنى غير لما أكون معزوم بجد ومرغوب فى وجودى ؟؟؟.. هل ممكن أمثل أو اكتب بموهبتي من غير ما اقعد استعض نفسى وصوري على الانستجرام واكتب صباح الخير وجمعة مباركة وإيه رأيكم فى اللوك الجديد أو أفضل أسوق نفسى بصوري فى الجيم وأنا اتصبب عرقا وأفرز عضلات من كل حته فى جسمي؟؟؟.

وأنهى حديثه قائلًا: "الحل الوحيد للتواجد عشان المنتجين والمخرجين يفتكروني، لكن أنا للأسف ماتربيتش كده واتربيت على احترام أهل بيتى وإنى اشتغل بموهبتى مش بتواجدى وخلاص، ويوم ما هستخدم السوشال ميديا هستخدمها لنشر الوعى وتقديم محتوى مش عشان اسوق لنفسى، هل ممكن اتعرف بشغلى ولا لازم اتعرف بالسوشال ميديا؟؟؟.. هل ممكن أمثل أو أكتب بموهبتي مش عشان أنا من شلة فلان أو صاحب فلان؟؟؟ مع العلم أن الوسط كله أصحابي لكن أنا مبعرفش أفضل أبعت للمخرج فلان والمنتج علان تحياتي وسلاماتي وبوستات عيدكم مبارك وصباح الرضا، ومع العلم أن أخويا المخرج العبقري أستاذ وائل فرج، ومع ذلك مابيقدرش يجيبني في أعماله أحيانا لأن جهة الإنتاج مش موافقة!!!..مش عايز ردود تعاطف، واللي عايز فعلا يساعدني يساعد أن البوست ده يوصل أو يمنشن حد من الوسط يكون عنده إجابات.. ولا نعتزل ونشوف حاجة تانية؟".