ميار الببلاوي: «نشوى مصطفى خلتني اتحجب وهي كملت في الوسط الفني»

كشفت الفنانة والإعلامية ميار الببلاوي عن خلافها مع الفنانة نشوى مصطفى، مشيرة إلى أنها كانت السبب وراء ارتدائها الحجاب ولكن الأخيرة أكملت مشوارها في الوسط الفني. 

وقالت الببلاوي: "بدأت مع الفنانة نشوى مصطفى مشوارنا الفني واشتغلت معاها كتير وكنت بعتبرها صاحبة عمري، لدرجة أنها كانت وراء قرار اتخاذي الحجاب، خلتني اتحجب وهي كملت في الوسط الفني".

تابعت: "خطيبي اللي هو وائل أبو ابني حاليا كان عايزني أسيب الوسط الفني وكل شوية يعملي مشاكل وحتى أنا كمان كنت بفكر أتحجب".

واستطردت: "فكلمت نشوى حكتلها ونصحتني وقتها بمنتهى الشفافية والأمانة إني اتجوز وأعمل بيت وقالتلي وإيه يعني احنا ناس لو اختفينا مش هيتحس بينا والموضوع أصلا مش بيستمر وكام سنة والجمهور مش هيعرفنا ولا هيتعامل معانا، اللي باقي البيت والعيال، حتى أنا روحت قعدت أفكر في كلامها وخدت قرار الجواز والحجاب، فأنا طول عمري بقدرها أنها نصحتني بحاجة زي كده".

وأدرفت: "بس لما حصل موقف بينا أنا جالي ذهول، متخيلتش أن الشخصية الخدومة واللي صاحبة صاحبها زي نشوى تعمل معايا كده، هى قلبت عليا والدنيا اتقلبت وابتدوا الاخوان واللجان الالكترونية يستلموا الموضوع، لما اتكلمت أيام الكورونا عن دينا الراقصة لما قالت أن احنا بنضحي بنفسنا عشان ننزل نصور ونسعدكم في رمضان".

وواصلت: "فأنا كان في دماغي وقتها لا أنتي متنزليش ومتعرضيش نفسك للخطر، رمضان هيجي سواء أنتي عملتي عمل درامي أو لا، لكن مش مشكلة لو رمضان جيه من غير مسلسلات، وهو شهر عبادة وطاعة مش مشكلة اتفرجنا على مسلسلات أو لا، متسائلة: "إيه الغلط في اللي أنا قولته ؟!".

واختتمت الببلاوي حديثها قائلة: "كلمتها في التليفون بعدها وصفينا الموضوع"،  وجاء ذلك خلال استضافتها مع الإعلامية مروة صبري في برنامج "قعدة ستات"، على شاشة القاهرة اليوم.

ومن ناحية أخرى، بداية الخلاف، كانت بمنشور كتبته نشوى مصطفى عبر حسابها بموقع "فيسبوك"، وجاء فيه: "السنة اللي فاتت في نفس التوقيت، زميلة عزيزة محجبة قالت نصا: أي ممثل بيشتغل في رمضان حرام عليكم سيبولنا رمضان نتعبد فيه.. واستعدت الناس على زمايلها اللي بيمثلوا مسلسلات رمضان، وزعلت مني لما دخلت عاتبتها، الدهشة إنها السنة دي مشتركة في مسلسل بتمثله دلوقتي هيتذاع في رمضان، ربنا يوفقها، أكيد هي حرة بس فكرة تغيير المواقف حسب المصلحة لفت نظري".

ومن جانبها؛ ردت ميار الببلاوي على منشور نشوى مصطفى دون الإشارة إلى اسمها بقولها: "اتفاجئت من بعض المتابعين ليّا على فيسبوك بعتولي اسكرينة بكلام منشور من زميلة محترمة بتروج إشاعة معرفش إيه مصدرها، ولأن مش متابعاها للأسف مخدتش بالي، أنا معرفش هي بتتكلم عن إيه، بس أنا لا تعليق، ولازم كلنا نفهم أن محدش بياخد رزق حد وكله بإيد ربنا، واحتراما لروح الزمالة اللي بينا والأيام الفضيلة اللي إحنا فيها لا تعليق على كلامك وأتمنالك الهداية".

وجدير بالذكر أن، في أبريل العام الماضي، كانت ميار الببلاوي، قد نشرت تصريحا للفنانة الاستعراضية "دينا" قالت فيه: "مضطرين ننزل نصور مسلسلات رمضان.. واللوكيشن كله كمامات ومطهرات"، وعلّقت "الببلاوي" قائلةً: "بجد مقدرين تضحياتكم الفظيعة في سبيل شهر ربنا شهر الرحمة والمغفرة والصلاة والصوم والذكر إنكم مصممين تضيعوه علينا، كأن رمضانكم غير رمضانا، استغفر الله".

تابعت: "كان رمضان مش هيبقى رمضان من غير المسلسلات والمسابقات واللهو اللي أغضب ربنا علينا، العمرة اتمنعت والأذان والمساجد اتقفلت، رحمة ربنا اللي محتاجينها دلوقتي اللجوء ليه مش لمسلسلاتكم، حتى لو صحابي هيزعلوا مني، بس ربنا بيقولكم سيبوا رمضان لأهل رمضان، اتقوا الله علشان يجعل لنا مخرج ويرفع الوباء والبلاء، مين معايا يا جماعة؟".

وفي سياق متصل، انتقدت "نشوى" تصريحات "ميار" للمرة الثانية، وكتبت حينها  عبر حسابها بموقع "فيسبوك": "ودي زميلة ممثلة ومش معتزلة على فكرة لأن قريب كانت بتمثل عادي، والأخت مش عارفة إنه حرام تغتاب زميلة ليها وحاطة صورتها.. لا حول ولا قوة إلا بالله".

وتابعت: "هو أنتي يا ميار اعتزلتي التمثيل؟ أصلك لحد قريب كنت عارفة أنك بتمثلي عادي حتى لو في رمضان.. وبعدين الممثلين يضيعوا عليكي رمضان ليه؟ أنتي عاقلة بالغة، وبعدين يا ستي اجتهدي وقاومي زمايلك الشياطين اللي بيلهوكي عن عباداتك علشان الجهاد ثوابه كبير ربنا يرزقك الجنة ويهدي زمايلك الأشرار.. يا ميار حرام تستعدي الناس على زمايلك وتقولي للناس مين معايا".

واختتمت: "عيب والله ده أنتي كلتي معاهم عيش وملح، ادعي بالهداية لكن غيبة ونميمة لأ، كوني قدوة وسيبك من لّم اللايكات، وادعي ربنا يتقبل طاعاتك ويغفر لك ذنوبك، غفر الله لنا ولكي، وعلى فكرة شيلي صورة دينا علشان حرام عليكي ده بيسمى في الإسلام غيبة لأنها ماتعرفش أنك حاطة صورتها، وبعدين اتقي مكر الله يا ميار إن مكر الله شديد، لا تزكوا أنفسكم هو أعلم بمن اتقى".

وكانت ميار، قد أعلنت مشاركتها في مسلسل "أهل الوادي" عام 2021، ونشرت صورة من كواليس تصوير العمل عبر حسابها على موقع "إنستجرام".