عمرو أديب ينفعل بسبب انتخابات الزمالك: مشوفتش الكلام ده من أيام الإخوان
كتب: محمود جودة
علق الإعلامي عمرو أديب على انتخابات نادي الزمالك، التي أجريت اليوم الجمعة، وشهدت العديد من المشاجرات والاشتباكات خلال عملية التصويت.
وقال عمرو أديب في برنامجه "الحكاية" للتعليق على الانتخابات: "اللي حصل النهاردة في انتخابات نادي الزمالك شئ مسيء جدا ومخجل، والله المنظر مش مشرف.. وهل المناخ ده ينتج عنه انتخابات نزيهة.. ما أعرفش، ولا حد يقدر يتكلم لكن أنا ولا يهمني".
وأضاف: "أعضاء نادي الزمالك صفوة في مصر وناس متعلمة وعلى مستوى.. ولكن مش معقول ده شكل نادي الزمالك.. شباب وكبار وستات بتتهرس في الأرض.. النهاردة كان في خناقة على صلاة الجمعة!.. مش معقول ده يحصل".
"احنا شوفنا انتخابات تانية زي الفل بدون اي مشاكل في الأهلي والصيد وغيرهم.. لكن احنا بنتخانق على إيه في الزمالك".
وقال أديب: "أنا عارف اني هادفع تمن اللي بقوله غالي.. ولكن لازم نعرف ايه اللي بيحصل، خناقات وألفاظ ما أقدرش أقولها ولا أذيعها.. كل ده على إيه؟".
واستكمل: "أنا ميهمنيش مين يكسب مش فارقة معايا.. هو ده نادي الوطنية؟.. رئيس الناس ماشي بميكرفون في وسط الناس، يا جماعة تعالوا يمين وتعالوا شمال، هو فيه إيه.. في ستات اتضربت وأطفال، وألفاظ قبيحة وحرب شوارع، أنا مشوفتش الكلام ده من أيام الإخوان".
واختتم حديثه بقوله: "في النهاية الكسبان هاياخد إيه؟.. ده نادي مش لاقي ياكل ومليان مشاكل.. واللي هايمسك هايقابل مشاكل كتير.. بتتخانقوا على إيه".
