أخصائي تمريض: «لا ترحل بطفلك حديث الولادة من المستشفى في تلك الحالة»
كتب: رحاب جمعة
حذر محمد خضير أخصائي التمريض، الآباء والأمهات من موقف يقوموا به مع أطفالهم حديثي الولادة يتسبب في مشكلات كييرة تصل للوفاة.
وكتب خضير على صفحته الرسمية على موقع التواصل الاجتماعي "فيسبوك" قائلاً :"نداء لكل أب أو أهل طفل لسه مولود، لو مراتك او بنتك او اختك الحامل ولدت طفلها في مكان أو مركز مفيش فيه دكتور أطفال وحد بلغك أن الطفل تعبان أو نفسه مش كويس ومحتاج يروح لدكتور أطفال أو يروح حضانة .. أرجوك .. أرجوك ماتاخدش الطفل وتمشي بيه علي ايدك وهو لونه أزرق زي اللي في الصورة كده".
وتابع قائلاً :"اللون الأزرق اللي علي الشفايف وتحت اللسان معناه أن في نقص في الأوكسجين اللي رايح للطفل وده ممكن بنسبة كبيرة يأثر علي مخ الطفل وأعضاء تانية مهمة ويسبب مضاعافات تستمر مع الطفل طول العمر بسبب نقص الأوكسجين اللي حصل.. أرجوك في الحالة دي أطلب أن الطفل يفضل مكانه علي دفاية غرفة الولادة علي الأوكسجين وماتشلش الطفل وتمشي بيه علي إيدك وهو لونه أزرق ارجوك للمرة المليون".
ووجه في حديثه الحل قائلا: "قدامك حاجة من اتنين .. اما تطلب دكتور أطفال يجي يحضر يطمن علي الطفل قبل ماتشيله من مكانه أو لو هايتنقل حضانة أطلب لازم يتنقل بإسعاف مجهز بأكسجين .. مش تنقله في عربيتك أو الموصلات ... الموضوع ده مهم لدرجة لا تتخيلوها وممكن ينقذ طفلك من نقص الأوكسجين اللي ممكن يدمر حياته وحياة أسرة معاه".
وأضاف قائلاً :"علشان تبقى فاهم جميع أعضاء الإنسان تحتاج اكسجين وطاقة علشان تشتغل، ومن غير الاكسجين مش هتشتغل والخوف هنا أن خلايا المخ لما بتتعرض لنقص الأكسجين بتضمر ولما خلايا المخ بتضمر مش بترجع تانى للأسف سواء ترجع للطبيعى أو ترجع تشتغل اصلا وعلشان كدا ضمور المخ نتيجه لنقص الاكسجين بيبقى درجات وممكن مع العلاج نطلع باقل مشاكل ممكنة".
وأشار إلى أن المشكلات التي تواجه الاطفال بسبب نقص الأكسجين، منها :"شلل دماغي ( الطفل جسم بينمو ولكن الإدراك والحركة والنظر والسمع والبلع مش شغالين ممكن بعض اول كلهم )، اضطراب فرط الحركة والانتباه، مشاكل في السمع، مشاكل في النظر".
