رضا البحراوي: «محمد عادل إمام صاحب فضل عليا وبستأذن منه قبل ما أغني»
كتب: نسرين إبراهيم
كشف المطرب الشعبي رضا البحراوي، عن موقف صعب تعرض له على يد نجم كبير، كان قد اتفق معه على غناء تتر أحد المسلسلات التي يقوم ببطولتها، وفوجئ أثناء ذهابه في الطريق لاتمام التعاقد، باتصال من الفنان يخبره أنه تعاقد مع مطرب آخر بدلاً منه.
وقال رضا البحراوي، عن المواقف الصعبة التي تعرض لها: "ممكن أكون مخلص الغنوة وفرحان وحد تاني يجي يعرض فلوس وياخدها، حصلتلي مرتين ومنهم مسلسل ناجح أوي، وكنت اتفقت مع النجم الكبير اللي كان في العمل وبعدين وأنا في الطريق كلمني وقالي بلح، قولتله حسبي الله ونعم الوكيل ولفيت ورجعت، وقعدت بعدها سنة مفيش شغل".
وأعرب رضا البحراوي، عن امتنانه الكبير للفنان محمد عادل إمام، قائلا: "بعد موقف المسلسل لقيت مدير أعمال محمد عادل إمام قالي الفنان عايز يقعد معاك، روحت قعدت معاه ووقتها كان في مسلسل هوجان ولقيته إداني تتر بداية ونهاية وسجدت على الأرض وحمدت ربنا، وقالي أنا مش هسيبك علشان أنت اتظلمت كتير".
وأضاف البحراوي: "جالي مسلسلات كتير أوي، لكن لازم أستأذن منه الأول وده حب وبيديني رأيه ويقولي ده أه وده لا، وهو كان حببني أوي من قبل ما أروح له، وتعاون معايا ووقف جنبي، وأنا من حبي بقيت أقوله أنا مش عايز حاجة منك من أدبك واحترامك وكفاية أنه نصرني قدام الناس وخلى ليا نفس، وهو صاحب فضل عليا".
