تامر عاشور يرد على عمرو مصطفى ساخرًا: «بعيونك الحلوة شوف خير في الصناعة»

علق الفنان تامر عاشور، على تصريحات الفنان عمرو مصطفى المثيرة للجدل من خلال برنامج "حبر سري"، بعدما اتهمه بسرقة واحدة من ألحانه.

وقال تامر عاشور عبر صفحته الرسمية على "فيسبوك"، موضحا بعض الأمور فيما يخص الأغنية ورأيه في تصريحات عمرو مصطفى الأخيرة.

وكتب تامر عاشور: "ردا على عمرو مصطفى" أغنية "الرك على النيه" ألحان عمرو مصطفى وفي أي حفلة ومكان بقول كده والملحن اللي باعهالي "المقتبس الحقيقي" عمرو مصطفى مجبش سيرته نهائي مش عارف إزاي مع أنه عارفه من 8 سنين لما قفلنا الموضوع ده أنا وهو في مكالمتنا مباشرة، وبعدين أنا مالي ده صراع مبدعين ويقدر ياخد حقه قانوني ويوقفها محدش منعه أنا أداه على كلامه ده غير إن الاستعانة بعمرو مش صعبه واشتغلنا مع بعض أغنيه "انطق"، كل الحكاية إنه معرفش يجاوب على السؤال "الصناعة انهارت إزاي وأنت عمود من عمدان الصناعة؟" السؤال اللي مش هتلاقي له إجابة مهما توهت الناس اللي كلهم قالولك إنك مجاوبتش بمنتهى الوعي".

وأضاف تامر عاشور: "وأنا الحقيقة كنت منتظر إجابتك علشان أقولك الصناعة فيها كام عمود غيرك وكام مطرب عمل تاريخ وعلامات من غيرك ومنهم أنا وكام ملحن وشاعر وموزع اشترك في نجاح مطربين وإعلانات وتترات وكل حاجه حصلت عادي بدونك، أني احترمتك أو على حد قولك إن تامر وهو بيكلمني "كان واقف كدهو" طبعا احترمك واقدرك أنت أستاذ كبير بس قليت في نظر تلميذك لما اتكلمت في التلفزيون عن أن فيه حد عموما احترمك وكأنه حدث جلل لأستاذ كبير زيك في النهاية إنت ملحن كبير مقاما وفنا وإضافة لأي مطرب غيري، هي الظروف حكمت كده ولا تاريخي فيه عمرو والعكس صحيح".

وتابع تامر عاشور: "ومش هفوت الفرصة دي إلا وأشكر كل الفنانين الكِبار المصريين المبدعين شعراء ملحنين موزعين اللي اتشرفت بالعمل معاهم على مدار 20 سنة وحطوني في مكانة أنا مكنتش أحلم بيها وسط الجمهور العربي كله اللي بنحاول نقدمله إبداع حقيقي مهما زادت بنا المناواشات الواردة التي لا تتخطى حاجز الأدب والصداقة والمحبة والود ولمصلحة نجاحنا واستمراريته بفضل الله ثم فضلكم، أشكر أعظم فرقة موسيقية بشتغل معاها جوه وبره مصر اللي بيخلوني قادر على التصدير الدائم والمختلف للفن المصري الرائع بحضوري كفرد من تلاميذ لأساتذة كبار حقيقيين".

واختتم: "أشكر مصر حبيبتي فعلا بدون إدعاء ولا مزايدة ولا حتى أغاني جمهورها اللي على كل الأذواق اللي بيسمعوا كل حاجة وكل لون وكل خبط ورزع وفي الآخر ياخدوا الحلو ويعيش معاهم ويصدروه ويرموا الوحش وباب النجاح لأي فنان عربي، اشكر بلدي السعودية وجمهورها اللي ضاف لتاريخي واسمي وتشكيل كيان محترم لحفلات عالمية حرفيا ومش من مرة واحدة بدأت هناك خطوات ومجهود وتعب ومساندة وهكذا إلى أن تمت النجاحات الكبيرة الحمد لله ومنها إلى كل الدول العربية اللي أعشق جماهيرهم وحبهم للفن المصري عموما الموضوع كبير قوي يا أستاذ عمرو تيجي حضرتك يا أستاذ في الآخر تقول عليا أني مثل حي لإستباحة جمل لحنيه لناس عايشة بالباطل وعايز بعيونك الحلوة دي تشوف خير في الصناعة؟".

جدير بالذكر أن عمرو مصطفى تحدث عن تامر عاشور خلال حلوله ضيفا على برنامج "حبر سري" من تقديم أسماء إبراهيم على قناة "القاهرة والناس" وقال عنه: ""يا تامر في أغنية أنا عملتها لمصطفى صندل التركي، إنت أخذت اللحن والتوزيع الموسيقي، ونزلت الأغنية وكتبت عليها اسم ملحن تاني، والمفروض إنك داخل صناعة الموسيقى".