نص كلمة الرئيس السيسي في يوم الشهيد: «ثمن كبير ادفع لكي نعيش»

تحدث الرئيس عبد الفتاح السيسي، عن معاناة أهالى الشهداء: «فراق الابن أو الزوج أو الأب صعب، وده ثمن كبير أوى اندفع علشان كلنا نعيش، فثمن ندفعه أننا نحافظ اللى هما ضحوا من أجله».

وأضاف الرئيس السيسي، خلال كلمته في فعاليات الندوة التثقيفية الـ 35 للقوات المسلحة: «روحوا شوفوا الوحدات دى.. سواء الموجودة في مصر.. أو في سيناء.. الكلام ده حقيقى.. والأفلام والدراما تعكس واقع الشباب اللى عايشين.. عنده زوجة وعنده ابن محتمل.. مش قال عنده طفل محتمل.. وراح لسيناء».

وتابع: «العمل الدرامى بيدخل كل بيت.. ويشوفوا الناس قد ايه التمن اللى دفعته أسر بعد لما ربت وكبرت وعملت وضحت وقدمت.. اللى قدمته شهيد أو مصاب بعد كان ملو الدنيا بقى شهيد.. هو ملو الدنيا برضه.. هو شهيد ملو الدنيا».

وتحدث الرئيس عبد الفتاح السيسي، عن حياة الضباط واستعدادهم للشهادة: «الكلام اللى قاله نور ضمن العرض المسرحى.. كل ضباط الجيش والشرطة بيقولوه.. صف الضباط والجنود.. هما عايشين حالة محتملة للشهادة.. عايشين فكرة الشهادة.. بيقول الكلام مقبل غير مدبر.. والسلاح في ايدى.. وأموت وسلاحى في ايدى.. بيقولوا الكلام ده».

وشهد الرئيس السيسي، سلام الشهيد في بدء الندوة التثقيفية بمناسبة يوم الشهيد، من أماكن مختلفة، وتحتفل القوات المسلحة المصرية يوم 9 مارس من كل عام بمناسبة يوم الشهيد، وذلك تخليدا لأرواح الشهداء والتذكير بالتضحيات التي قاموا بها في سبيل الحفاظ على الوطن، وتأتي الاحتفالات تزامنا مع ذكرى استشهاد الفريق أول عبد المنعم رياض 1969.

فيما شارك الفنان على الحجار، في أداء أغنية «رسالة نور»، عن الشهداء ضمن فعاليات الندوة الثقيفية الـ35 للقوات المسلحة بمناسبة يوم الشهيد.