بعد 160 يومًا من المحاولات.. نجل محمد ثروت ينجح في الترجل

يواصل المطرب والمخرج أحمد ثروت، نجل الفنان الكبير محمد ثروت، رحلة علاجه بألمانيا، بعد إصابته بمرض نادر أفقده القدره على الحركة، حيث شارك جمهور بمقطع فيديو جديد وهو يحاول المشي عن طريق بعض الأجهزة الطبية تحت إشراف الفريق الطبي المعالج له.

وظهر نجل محمد ثروت في الفيديو، أثناء التأهيل الطبي ومحاولة المشى بمساعدة فريق طبي في ألمانيا، وعلق قائلاً: «الحمد لله كرم من ربنا وبفضل دعواتكم النهاردة بعد 160 يوم صراع مع متلازمة ميلر فيشر، اول يوم انجح إني اقف تاني علي رجلي بعد عشارت الأسابيع ومئات المحاولات».

وأضاف: «اتعلمت كتير من اختبار ربنا ليا، اتعلمت الرضا والحمد علي كل حال وان ستر ربنا علينا فوق كل شيء ومدي تحملك بيجي معاه كرمه ليك فالاخر وانه مش هيخذلك طول مانت مسلم امرك وان عادي ممكن ابتدي تاني كل حاجة من الاول وان لسه في امل طول ما في حياة».

وتابع: «ربنا ألهمني في أول الإصابة إني اوثق الاختبار دة من أول يوم حتي الآن، ودة عشان أول ما أقوم إن شاء الله اتمني اكون سبب ف التوعيه لمثل هذه الأمراض النادرة وإزاي لو لقدر الله اتصابت انت بيها أو حد قريب منك تتعامل معاه إزاي لأن جزء كبير من التعافي هو الحالة النفسية للمصاب».

وأكمل: «حابب اقول حاجة من قلبي بجد، الكرم الي ربنا كرمني بيه دة نور لي حاجات كتيرة، خلاني اقعد مع نفسي اقيمها وعرفني قيمة نعمة نعمة هو مديهالي زي اني ادخل الحمام لوحدي أو اعرف أكل لوحدي أو أمشي خطوة او حتي اتحكم ف جسمي وإلى معظم الناس ماتعرفوش اني كنت فقدت بصري لاسابيع ف عيني اليسري وفقدت القدرة علي التحكم فالكلام لاكثر من شهر». 

وأردف: "كل يوم كنت بسأل نفسي وانا في ظروف دي لو ربنا افتكرني هو انا قدمت ايه لكل الي حواليا؟!…و وصلت دلوقتي ان بقي عندي هدف اكبر من اني انجح او اشتغل لنفسي بس، خلي عندي احساس بحاجات قيمتها لما دخلت فيها وحسيت بيها زي مثلاً واحد جالة المرض الي صابني ومش عارف وفاكر ان عنده مرض تاني وتوفي عشان عنصر الوقت لم يسعفه او مريض تاني عرف التشخيص ومعهوش فلوس العلاج نظراً ان العلاج بتاع الامراض المناعية زي حقن الاجسام المضادة غالية جداً… ان شاء الله قريباً جداً هقول عن حاجة شغال عليها هتخفف المعاناه عن اي حد محتاج مسانده او مساعده ويارب ربني يقدرني وماشوفش حد يدخل ف اختبار زي الي انا مريت بيه".

واختتم: "اخيراً حابب اشكر كل واحد دعالي من قلبه وكل صحابي واهلي الي كان حبهم ليا من اسباب اني اقف تاني علي رجلي بعد ستر و توفيق ربنا.. ودعواتكم ليا لإتمام الشفاء علي خير ويارب يكون ربنا جعل مني بعد اختباره دة انسان افضل"