فنانون يستغيثون بسبب تجاهلهم: عايزين نشتغل

"التجاهل من الوسط الفني" أزمة يعيشها عدد كبير من الفنانين خلال الوقت الحالي والسنوات الماضية؛ فأصبح لا يمر يومًا واحدًا بدون استغاثة شخص من الوسط الفني بسبب عدم عمله وتجاهله من قبل شركات الإنتاج. 

فاستغاث اليوم الفنان الشاب شريف أدريس من إهمال الوسط الفني له، معلنًا اعتزاله وعدم رغبته في العمل مجددًا به، وطلب من أصدقائه البحث له عن فرصة للسفر بالخارج، حيث كتب عبر حسابه ب"فيسبوك" : "بعد ٣٥ سنه سعي وتعب وشقى في الوسط الفني قررت الاعتزال والابتعاد تماما وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد، وده قرار أخدته بعد ما الأمور وصلت في الوسط الفني لمرحله عبثيه وصلت إني بقيت بشوف بعض الزملاء بيشحتو الشغل علني علشان يشتغلو لأن الشغل بقى متقسم علي ناس معينه".

وأضاف: "الأمور وصلت لكدة، لأ أبعد أحسن وحتي لما بيجي شغل بيتفرض عليك توافق بأقل الفلوس وتخرج من الشغل مديون، ومواقف مهينه زي أن شركة إنتاج تعرض عليك أجر هو قيمة ربع أجرك والسبب إنهم الميزانيه مصروفه عالديكور، طب خلو الديكور يمثل، هحكيلكم موقف حصل معايا من أسبوع، أتصل بيا حد قالي عايزين حضرتك بكره عندك تصوير في مسلسل كذا بس هتدفع عشره في الميه للكاستينج دايريكتور، كان هيجيلي جلطه بعد ماقفلت المكالمه ووافقت علشان أنا محتاج أشتغل ومحتاج فلوس، ومقدرتش استوعب الفكرة بصراحه إني بعد العمر ده مضطر أدفع علشان اشتغل فاتصلت واعتذرت، وده الحال حاليا أن الأمور بقت في أيد الكاستينج دايريكتور، وده موقف من مواقف كتير مريت بيها لو حكيتها محتاجه كتاب مش بوست عالفيس".

وتابع: "طالما الشغل بقي لازم يتدفعله، وطالما الشغل بقي بالشحاته، يبقي بلاش أحسن أنا طول عمري راضي الحمد لله، بس حقيقي أنا وصلت لمرحلة اكتئاب وصلتني إني  بقيت بنام أحلم بكابوس إني  بقتل عيالي وبقتل نفسي لأني وصلت لمرحله نفسيه وماديه إني  بقيت مش قادر أربيهم ولا أصرف عليهم وأنا عندي تلات أطفال بعبدهم عباده متخيلين حجم المسؤلية، وبقيت مديون لطوب الأرض، وحقيقي لو حد عنده فرصة سفر ليا هاكون شاكر ليه جداً وهيكون جميل في رقبتي لحد ما اموت لأن حقيقي أنا مش قادر أعيش في البلد دي تاني أنا حاولت أسعى في أي مجال تاني بس ماقدرتش".

وأكمل حديثه: "وحقيقي لو أتعرض عليا بطولات بعد البوست ده هرفضها لأن البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله علي كل شئ، همسح أبلكيشن فيسبوك من تليفوني لأني هنزل ابيع تليفوني أصلاً.. فأنا هاكون متاح أونلاين لحد بالليل، لو حد عنده فرصة شغل وسفر ليا ومش معاه رقمي ياريت يجيبه من أي حد".

كما كتبت الفنانة عفاف مصطفى مستغيثة بالمخرج سامح عبد العزيز، قائلة: "نداء .. المخرج حبيبي الإبن سامح عبد العزيز، اللي كانت مفيش مسلسل يعمله طول حياته من غير مايفرحني ويشركني فيه 
خلاص.. بطل يشغلني".

وأضافت في منشور آخر: "أيوه المجال الفني زحمه جدًا والبقاء للأشرس وأنا فرهضت من الخوازيق 
  لكن مش هتنازل عن إختياراتي وصمودي لآخر نفس".