ماندو العدل عن محمد رمضان: فنان مميز وبيعبر عن الشباب.. ليه بتشككوا في موهبته؟

دافع المخرج ماندو العدل عن النجم محمد رمضان والذي تعاون معه في فيلمه الأخير "ع الزيرو"، والذي يعرض حاليا بدور العرض السينمائي، وأكد أنه فنان محترف ويعبر عن الشباب، كما رد على من ينتقده بسبب أعماله الفنية التي قدمتها في بداية مشوراه الفني.

قال ماندو العدل عن فيلم "ع الزيرو": ورق فيلم ع الزيرو كان مكتوب لمحمد رمضان مخصوص واتفقنا عليه من 5 سنين ولكن اتأجل وكلنا انشغلنا لحد ما اتكلما عن الفيلم تاني السنة اللي فاتت ومحمد كان حابب الفيلم والفكرة من الأول وبدأنا تصويره.

وأضاف:  لما بنعمل أي فيلم مش بنكون واثقين من نجاحه 100% ولكني حبيت فيلم ع الزيرو لإنه بيعبر عن مشاكل محدودي الدخل وخصوصا لما بيصاب حد منهم بمرض السرطان لأنهم مش بيكونوا عندهم مصدر دخل كافي ولا حول لهم ولا قوة ومفيش صوت بيعبر عنهم ورهاني على الفيلم بسبب أن محمد رمضان عنده شعبية ومؤثر وهيقدر يوصل الرسالة للجمهور.

وأوضح: الجمهور بيحصر محمد رمضان في نوع معين من الأفلام ودي مش حاجة حلوة ولكن أنا كمخرج بشوف محمد رمضان موهوب وبنطلع نتيجة كويسة في الأعمال سوا، وبالفعل أعماله أثبتت موهبته ونقدر نشوف قد إيه مسلسلاته وأفلامه نجحت.

وأشار: بستغرب لما حد لسه بيسأل هل محمد رمضان موهوب ولا لا، ليه الناس بتشكك في موهبته؟ هو طبعا موهوب، وأنا حاولت أظهر للناس قد إيه هو شاطر  في فيلم ع الزيرو وشبه المصريين ووشه منحوت وبيعبر عن الشباب، والحمد لله الفيلم نجح والجمهور استقبله بشكل كويس.