«زي القمر وبرافو أخدت التريند».. أول تعليق من شريف منير على حلاقة أسما شعرها
كتب: شروق خالد
دافع الفنان شريف منير عن ابنته أسما، بعد الانتقادات التي تعرضت لها عقب قيامها بحلق شعرها في فيديو نشرته عبر حسابها الشخصى على "إنستجرام"، ثم ظهورها حليقة الرأس في حفل توزيع جوائز مهرجان القاهرة للدراما مساء الخميس.
وقال "منير": "إيه الضجة والدوشة اللي إنتوا عاملينها دي، كل ده علشان بنتي قصت شعرها قدام الكاميرا، إيه الغلط اللي عملته، تصرف عادي جدا مفهوش أي حاجة".
وتابع: "إوعوا تفتكروا إن أنا ممكن آجي على بنتي علشان خاطر أكسب رضاكم، دي بنتي اللي مليش غيرها واللي بحبها، وبالمناسبة اللوك عاجبني وأنا مبسوط منها أوي".
واستطرد: "قبل الإخوة السادة الملايكة الصالحين، اللي عمالين يقلوا أدبهم ويشتموا، ويقولوا بتاخد تريند وأبوها معرفش يربيها، أنا بنتي متربية كويس جدا، وبتتصرف باللي هي حاسة بيه، المهم إنها مش بتؤذي حد، وقبل ما تتكلموا بصوا على نفسكو وعلى ولادكو وإخواتكو قبل ما تنتقدوا وتغلطوا".
واستكمل: "ريحوا نفسكو واهدوا شوية، اللي حصل من بنتي مش غلط، وهي حرة في نفسها، وبنتي عندها 36 سنة وأم ومسؤولة عن نفسها، أنا أب مسؤول إني أحميها، وهي حرة في تصرفاتها".
وفي الختام، وجه شريف منير رسالة لابنته قائلًا: "أسما إنت شكلك زي القمر وكان حلو جدا، وبرافو عليكي إنك أخدت التريند، متسمعيش كلام حد ومتهتميش بكلام حد، وأنا مش مهتم بالكلام اللي بيتقال عني أو عليها"، في فيديو نشره عبر حسابه بموقع التواصل الاجتماعي Instagram:
View this post on Instagram
وكانت أسما ابنة الفنان شريف منير، قد علقت على حالة الجدل الواسعة التي أحدثتها بسبب حلق شعرها بماكينة الحلاقة، أمام متابعيها عبر حسابها الشخصى على إنستجرام، مؤكدة أنه قرارًا لم يكن سهلًا عليها.
ونشرت "أسما"، مقطع فيديو يوثق لحظات حلاقة شعرها، قالت فيه: "حاسة إني هيغمى عليا.. ده جنان".
وتابعت: "شعري بقاله فترة بيقع جامد، ده غير أن من كتر العمايل اتحرق وبقي مش صحي خالص، غير الغده وتأثرها عليه، قررت انفذ قرار كان بقالي كتير أوي نفسي أخده، ابدًا من جديد، احرر نفسي، افتح صفحة جديدة، حقيقي هو قرار صعب جدًا بس حسسني بقوة وتفاؤل".
إقرأ أيضًا:
أسما شريف منير: محتاجين حضن أو اثنين على الأقل في اليوم
واستطردت: "رميت ورايا حاجات كتيرة أوي بمجرد اني شلت شعري، قلبي كان بيدق جدًا وبعديها حسيت اني مليانة ادرينالين.. خطوة جريئة ومرعبه بس حاسة إني طالعة منها بدرس".
واختتمت ابنة شريف منير: "عارفة إن في ناس كتير هتهاجمني بس انا فراق معايا احساسي بالراحة اللي أنا حسها دلوقتي عادي هيطول تاني بس الاحساس ده مش هحسه غير مرة، بكره هتشوفوا النتيجة الاخيرة".
View this post on Instagram
يذكر أن، أسما هي ابنة الفنان شريف منير، وقدما معا برنامج عُرض على قناة ON E، وحمل اسم "أنا وبنتي"، واستضافا خلاله مجموعة كبيرة من نجوم الفن، بينهم: تامر حبيب، سلوى خطاب، داليا مصطفى، هنا شيحة، أحمد فلوكس، نجلاء بدر، عمرو يوسف، إلهام شاهين، خالد سليم، مصطفى خاطر، وهنا الزاهد.
