خالد محمود: ضحيت بالطيران من أجل التمثيل
كتب: مؤمن نصر
تحدث الفنان خالد محمود عن كواليس بدايته الفنية: كنت عايز اقدم في معهد فنون مسرحية وكنت عايز اقدم في طيران، التنسيق وداني دار علوم قولت هقدم الأول في معهد فنون مسرحية روحت اقدم لقيت التقديم خلص قولت هقعد سنه في دار علوم، وقدمت وروحت وعملت الاختبار بعد السنه ما خلصت ونجحت ودخلت التصفية التانية والتالتة لقيت اسمي في الـ 14 واحد اللي نجحوا وهنا سيبت دار علوم.
وأضاف خالد محمود خلال تصريحاته مع الإعلامية انجي هشام في برنامج المنسي عبر قناة هي: خلصت المعهد وابتدت العروض تجيلي رغم أنه أنا بمثل في سنه تانية معهد وأول عمل ليا كان مذكرات زوج مع الأستاذ محمود ياسين، طلبني الراحل بعدها فريد شوقي في فيلم شاويش نص الليل وابدت العروض تتوالى.
تابع: في نفس الوقت حلم الطيران كان شاغلني ولقيت التقديم نزل روحت قدمت وعملت كشف طبي ونجحت، قولت أيه العظمة دي روحت ودرست طيران لكن التمثيل كنت عملت فيه رصيد فكان الطلب كبير وكنت بعمل ٦ و ٧ مسلسلات وكل مجال عاوز تفرغ فالتمثيل سحبني وروحت.
