بسمة وهبة لـ أحمد سعد بعد انفصاله عن زوجته: «الشهرة غيرتك.. اوعى لما تعلى تديها كتف»

حرصت الإعلامية بسمة وهبة، على تقديم نصيحة للفنان أحمد سعد، بعد إعلان مصممة الأزياء علياء بسيوني طلاقهما، اليوم، من خلال منشور لها عبر خاصية الاستوري بحسابها الرسمي على "إنستجرام".

وقالت بسمة وهبة: "فوجئنا النهاردة ببوست نازل من علياء زوجة المطرب أحمد سعد، وهو بوست قاسي جدا وواضح إن علياء كانت موجوعة جدا.. الست ما تعملش كده إلا إذا حد جاب ولاعة وولع لها في حتة من جسمها أو قلبها".

وأضافت: "عايزة أنصحك يا أحمد نصيحة اعتبرها نصيحة إعلامية وأخت وتقدير، الشهرة والنجومية والفلوس لازم تغير البني آدم وتزغلل عينيه، وأوقات ربنا يديها للبني آدم اختبار أو مكافأة للست اللي معاه وبناتك، إنت طول عمرك من أجمل الأصوات، لكن ماكنتش بنجومية وشهرة النهاردة".

وتابعت: "نصيحتي لكل راجل عنده واحدة ست وقفت جنبه إوعى لما تعلى تديها كتف ربنا مش هيكرمك، وياما مطربين كانوا فوق في السما ودلوقتي في الأرض علشان افتروا على زوجاتهم".

واستكملت خلال تقديمها برنامج "90 دقيقة" المذاع عبر قناة المحور: "علياء ساعدتك ووقفت جنبك كتير يا أحمد، خلي بالك وما تجيش على ستات مصر دول محميين بآل البيت، وأتمنى أحمد وعليا يكونوا رجعوا لبعض والشيطان اللي بينهم مشي".

يذكر أن مصممة الأزياء علياء البسيوني أعلنت انفصالها عن الفنان أحمد سعد وذلك عبر خاصية الإستوري على حسابها بموقع إنستجرام، وجاء الطلاق بعد زواج لمدة عامين، بعد إنجابها لطفلتها الثانية منذ شهر.

علياء بسيوني تكشف تفاصيل انفصالها عن أحمد سعد

وقالت علياء في منشور لها: "الحمدلله على كل شي.. تم الطلاق بيني وبين أحمد من شوية بناءً على رغبته، حابة أشكر أحمد جدًا على أصله الغير طيب، ومعدنه السئ.. وحابة أقوله شكرًا على قرارك اللحظي الغير موفق في خراب بيتنا وتدمير أسرتنا الجميلة، اللي أنا حقيقي تعبت فيها لوحدي تمامًا وحاولت وعديت بمواقف مفيش حد في مكاني يقبلها.. عشان الأسرة دي وعشان المشوار اللي أنا ابتديته ومكنتش حابة إنه ينتهي".

وأضافت: "شكرًا على توقيتك الجميل وأنا قاعدة ببنتي 3 أيام وأنت مش عارفة حاجة عشان مشغول الساحل وخروجاته وبعدها شغلك، أكبر شكر على المقلب اللي أنا اخدته في العلاقة دي واللي كنت فاهمة إن ليها قيمة ببني وبضحي وبتنازل عشانها وأنت طلعتها ولا تسوى ربنا معايا أنا وبناتي في اللي جاي وينتقم منك ويديلك على قد كل حاجة حصل".

اقرأ أيضا: حكيم يكشف عن موعد طرح أغنيته الجديدة «واحد بس»