عمرو سلامة: «بتخانق مع مراتي كل سنتين.. ولو فقدت أعصابي هتحول لوحش»

كشف المخرج عمرو سلامة، عن طبيعة علاقته بزواجته، والمعايير التي اختار من خلالها زوجته الثانية، وذلك بعد فشله في الزواج الأول.

قال سلامة عن زواجه الثاني خلال حوار له مع برنامج "The you in in human": "أنا حاليا سعيد في جوازي واحنا معندناش اهتمامات مشتركة ولا بنحب نفس الحاجات بس عندنا شكل للحياة احنا الاتنين عايزين نعيشه وجوازتي التانية مكنتش مبنية على معايير محددة لكن احنا الاتنين مبسوطين في وجود بعض، وعارفين نتأقلم مع بعض واحنا الاتنين متفقين على حاجات اساسية في حياتنا وعندنا رؤية واحدة لمستقبلنا وتشابه في طريقه الحياة".

وعن عيوب شخصيته، قال "أنا عندي عيب اني شخص مش بيحب يتخانق وزمان كنت فاكر أن دة ميزة والفرق بين جوازي الأول والثاني هي أن في الأول مكنتش بتخانق بس مكنتش بعبر عن الحاجات اللي مضيقاني، أما دلوقتي فأنا مش بتخانق لكن بتكلم في أي حاجة مضيقاني وبواجه اكتر".

وأضاف: "أنا مش شخص عنيف لأني عارف لو فقدت اعصابي هتحول لوحش وكل سنة في فترة بتخانق خناقة كبيرة غالبا بتكون في الشغل وبندم بعدها والحمدالله مع مرور الوقت الفجوة بين كل خناقة وخناقة بيزيد في الأول كنت بتخانق كل 6 شهور ودلوقتي بقت كل سنتين".

وعن الجملة التي شجعته على الانفصال قال "في جملة شجعتني على الطلاق وهي "السعادة على بعد 10 دقايق من مواجهة صعبة".. فاحنا احيانا بنتخيل أن السعادة بعيدة لكن احيانا بتكون قريبة وبنحصل عليها بعد مواجهة صعبة ممكن مع الآخر أو مع نفسنا والعشر دقايق هنقول فيهم الحقيقة كاملة وهنعبر عن مشاعرنا بأكتر طريقه لبقة بس هنواجهه نفسنا أو الآخر".

يذكر أن عمرو سلامة عرض له فيلم "برة المنهج" مع ماجد الكدواني، روبي، الطفل عمر شريف، أسماء أبو زيد وغيرهم نخبة من النجوم.

اقرأ أيضا: رانيا يوسف:«المرأة العربية مش واخدة حقها»