حورية فرغلي: خطيبي كان 175 كيلو وبيعرج برجله.. لكن أجمل راجل شوفته

روت الفنانة حورية فرغلي ذكرياتها، مع خطيبها الراحل، الذي ارتبطت به بشكل كبير، فعلى الرغم من مرور 21 عامًا على وفاته إلا أنها لم تستطع أن تمحِ هذا الحب، كما كشفت عن أسرارًا جديدة بحياتها.

وقالت "فرغلي": "أنا شُفت الحب مرة واحدة في حياتي سنة 2002، مع خطيبي اللي توفى، ومن بعده محبتش حد تاني رغم مرور 21 سنة، خطيبي اللي مات كان 175 كيلو، وكان عنده مشكلة في رجله الشمال، فكان بيذق، وكنا قد بعض في السن".

وتابعت: "رغم مرضه لكن كنت بشوفه أحلى راجل في الدنيا، والناس كلها تقول إيه الجنان ده، لكن مكنتش ببص لكلامهم بصيت لقلبه واللي جواه، كفاية إني سامعة صوته، كفاية وجوده في المكان ريحة برفانه، من ساعة ما مات وأنا مش لاقية حد غيره".

واستكملت: "قضينا سنتين سوا متخانقناش مرة، كل ما أطلع الاولى في الفروسية أروح البيت ألاقية جايب لي تورتة كبيرة عليها صورتي ولعب، بدور على حبه مش لاقية، ساعات بقول لنفسي أنا شُفت الحب ده كله ليه لما في الآخر هيتاخد مني، لكن ربنا اللي عايز كدة".

واستطردت: "من بعد وفاته مرتبطش بحد ولا حد أتقدم لي، رغم مرور 21 سنة مشوفتش زيه، مش عارفة ليه، بتحب كتير بس بتصدم لما أعرف السن، وفي شاب بعت لي رسالة طويلة يعبر فيها عن حبه لي، قلت له أنت عندك كام سنة، قالي 22 سنة قُلت له أنت قولي يا طنط".

واختتمت حورية فرغلي حديثها قائلة: "أنا معنديش صحاب ومبخرجش خالص، وبحب الحيوانات جدًا، كان عندي 13 كلب دلوقتي بقا 1، وعندي 8 أحصنة، مبخرجش مع الناس لان محدش بيعزمني على حاجة، اتعودت اعيش لواحدي وبراحتي، بيتهئلي لو أتجوزت مش هستحمل حد ينام جمبي على السرير، كمان هيبق في مشكلة، لأني بحب أمشي في شقتي براحتي واجري مع الكلاب، مش شرط كل يوم ميكب وشعر ورموش، أنا باكل ضوافري أصلا".

وجاء ذلك، خلال لقائها مع الإعلامي تامر شلتوت، ببرنامج في "العمق".



إقرأ أيضًا: 
بعد تكذيب حورية فرغلي له.. نزار الفارس يرد: «قالتلي أنا كبرت في السن فطلبت إيدها على الهواء ووافقت»



يذكر أن، أخر أعمال الفنانة حورية فرغلي مسلسل "أيام"، بطولة مجموعة من النجوم أبرزهم: رياض الخولي، حمدي السيد، شيري عادل، سلوى خطاب، وغيرهم، من تأليف سماح الحريري، وإخراج محمد أسامة.