هشام جمال يكشف عن خسارته ماديا بسبب تعطل تصوير وعرض مسلسل «عالم موازى»

كشف المنتج والفنان هشام جمال للمرة الأولى عن الأسباب الحقيقية وراء تأجيل مسلسل "عالم موازي" بطولة الفنانة دنيا سمير غانم،  الذي كان من المقرر عرضه خلال موسم رمضان الحالي.

وأوضح "جمال" بقوله: "مسلسل عالم موازي اتأجل للمرة الأولى بسبب ظروف مرض الله يرحمهم الثنائي سمير غانم ودلال عبد العزيز ودنيا وأنا كمان كنت اتعديت، ساعتها علشان نلحق نخلص المسلسل بنينا ديكورات المسلسل بالكامل على أمل إنه لما نخف يكون كل شيء جاهز".

وتابع: "حصل تغير في توجهات القنوات وطلباتهم السنة دي، ومبقاش مطلوب السنة دي مسلسلات 15 حلقة على القنوات المملوكة للشركة المتحدة، وأنا فلوسي متعطلة بقالها سنتين وأكتر واحد نفسه المسلسل ينزل عشان أرجع فلوسي اللي اتصرفت، وكل الناس في العمل نفسهم ينزل".

واستطرد: "أنا عرضت على دنيا أكتر من مرة إنه نخلي المسلسل 30 حلقة، لكن أنا مقدر ظروفها النفسية، وهي قالتلي إن قدرتها 15 حلقة فقط وأكتر من كدة مش هتقدر دلوقت".

وفي سياق متصل، أشار الفنان والمنتج هشام جمال إلى علاقته القوية بالنجمة دنيا سمير غانم مختتما بقوله: "أنا مش محتاج أوصف علاقتي بدنيا، غير إنها عشرة 10 سنين وأكتر من أختي وأكتر فنانة موهوبة في الغنا والتمثيل، ومن أول يوم وأنا موجه مجهودي وتمويل الشركة لشغل دنيا، عشان كده عمري ما هضغط عليها في وقت صعب عليها وظرف استثنائي، دلوقتي الوضع إننا بنشوف إيه المناسب للمسلسل سواء عرض على منصة إلكترونية أو خارج الموسم الرمضاني"، وجاء ذلك في تصريحات تليفزيونية عبر قناة "الحياة".

"عالم موازي" ينتمي إلى الأعمال الدرامية الاستعراضية، في شكل أقرب للفوازير، وتقدم فيه النجمة دنيا سمير غانم خلال 15 حلقة، عدد من الشخصيات، من خلال قصص مختلفة.

المسلسل من بطولة مجموعة من النجوم أبرزهم: عمرو وهبة، وشيماء سيف، وأوتاكا، وإسلام إبراهيم، والراحلة دلال عبد العزيز، وعدد كبير من ضيوف الشرف، وتأليف عمرو وهبة وهشام جمال ومن إخراج وإنتاج هشام جمال، وتدور أحداثه فى إطار كوميدي.