سحر نوح عن جدل ظهور نجاة الصغيرة: «كفانا تنظير على خلق الله ومش كل حاجة الفلوس»
كتب: نسرين إبراهيم
علقت الفنان سحر نوح، على جدل ظهور الفنانة الكبيرة نجاة الصغيرة، في حفل توزيع joy awards، حيث انتقد البعض ظهورها بعد كل هذا العمر وابتعادها عن الأضواء.
وكتبت سحر نوح، عبر حسابها الرسمي على فيسبوك: «عارفين يعني إيه فنان يكون عاش عمره كله بيبدع ويمتعنا وبعد ما بيكون الناس ملمومه حواليه ليل نهار بتتمني بس تشوفه وتقعد معاه وبعدين يكبر وشغله يندر ويتنسي وهو في الكبر».
وأضاف: «عارفين بقي سعادته بتبقي قد إيه لو شاف ان فيه ناس بتسآل عليه وعاوزه تشوفه وبتكرمه وتحبه وتشكره علي نبع عطائه بدون معايره بالسن او الوهن ولا فرض وصايه وتآنيب».
وتابعت: «مش كل حاجه تقولو الفلوس ولو ان الاحتياج للمال مش سبه مادام بالحلال، وجميل إن الإنسان ميحتاجش ولا يمد إيده، ليه بقي التجريح في الناس وفرض الوصايه وصب اللعنات والتآنيب مين فيكو لو جاتله فرصه زي دي هيرفض يتقدر، ولو انت شايف إن الناس كبرت فلو قمت وبصيت علي نفسك في المرايه حتلاقي نفسك برضه كبرت هل مطلوب منك تختفي بقي علشان تفضل صورتك حلوه في خيال الناس، هل مطلوب منك تموت وانت عايش علشان فيه بعض من البشر رافضين يشوفوك وانت كبير نفسي قبل منحكم علي البشر نحط نفسنا مكانهم ونفهم ظروفهم ونسيب كل واحد ياخد قراره بحريه وكفانا تنظير علي خلق الله".
اقرأ أيضا: في عيد ميلادها الـ 78.. نبيلة عبيد: أعشق الأدوار اللي بتظهر أنوثتي.. والجانب الإنساني بأعمالي واضح
