«وقعت من طولها».. هاني مهنا يكشف كواليس طلاقه لـ سميرة سعيد

كشف الموسيقار هاني مهنا عن كواليس طلاقه للديفا سميرة سعيد، موضحًا أنهما اتفقا على الانفصال بشكل حضاري دون مشكلات بينهم وذلك بعد مرور 8 سنوات على زواجهم.

وأوضح "مهنا" بقوله: "اختلفنا علشان الخلفة، وأنا كنت صادق جدا معها لما اتفقنا على الزواج قولتلها أني عندي ولد وبنت، وقالتلي وقتها أنها مش عايزة تخلف، واتفقنا على كدة".

وتابع: "بعد أكتر من 5 سنوات من الزواج، والدتها وأختها قالولها لو حصلك حاجة من هيورثك لازم تخلفي، مضيفًا: "لما جت واتكلمت معايا وحاكتلي اللي حصل، صعب عليا، وقولت ليه احرمها من الخلفة".

واستطرد: "حاولنا في موضوع الخلفة لكن للاسف محصلش نصيب، وسافرنا باريس وعملنا عملية أنابيب هناك وقعدنا هناك لمدة شهر ولكن محصلش حمل، وسبحان الله ربنا مأرادش لكن شاء لما ننفصل، أنا أجيب هنادي وهي تجيب شادي".

وفي سياق متصل، أوضح الموسيقار أنه بعد مرور فترة من السفر إلى باريس، طلبت سميرة سعيد أن ينفصلا بعد انتهاء جولة حفلاتهما سويًا في الولايات المتحدة الأمريكية بقوله: "صعب عليا، لأن الراجل اللي يقرر الطلاق مش الست، مع احترامي لكل امرأة".

وتابع: "قبل السفر بـ10 أيام، كلمتها قولتلها تعالي لازم تمضي عقد للمتعهد وكانت بتلعب ماتش تنس، وأحضرت مأذون ببدلة وواحد صاحبي وابن عمي، حضرت ورق الطلاق جت سميرة، قلت لها طلبتي نقعد بعد الصيف، لكن مش أنتي اللي تقرري، أنا اللي أقرر نتطلق دلوقتي".

واختتم الموسيقار هاني مهنا بقوله: "وقعت من طولها وجابولها ليمون، وكانت مفاجأة لم تتخيلها، إحنا الاثنين كنا بنحب بعض، لكن قرار الانفصال مش الست اللي تقرره، ده عيب"، وجاء ذلك خلال اسضافته مع الإعلامية راغدة شلهوب، في برنامج "سابع سما"، المُذاع عبر فضائية "النهار".