أحمد عبد الوهاب يروي قصة زواجه: «حصل في 10 أيام ومن غير مطبخ»
كتب: مؤمن نصر
روى الفنان والسيناريست أحمد عبد الوهاب قصة زواجه من "داليا" ابنة الفنان صبحي خليل، وكيف أن تجهيزات الزفاف تمت خلال 10 أيام فقط، دون استعداد مسبق.
وأضاف "عبد الوهاب" خلال حواره ببرنامج "معكم منى الشاذلي" على قناة ON: "إحنا فرحنا اتعمل في 10 أيام، يعني بقول لباباها هنتجوز إمتى؟ .. قالي إنت عايز إمتى؟ قولتله أنا عاوز أعرف بس، قالي ماشي يلا يوم 6 شهر 9 اللي هو وقتها كان بعد أسبوعين تقريبا".
واستطرد: "قولتله بعد أسبوعين إزاى يعني، وكانت الشقة خالصة وكل حاجة بس كان لسه فيه حاجات كتير ما اشترينهاش فى الشقة ولا مطبخ ولا أي حاجة، وغير كده مكناش عارفين نعمل الفرح فين، فروحت مكان وسألت لقيته حلو، قولتله يوم 6 المكان فاضي؟ .. قالي ده بعد بكره، قولتله اه عارف وحجزت ومشيت".
وواصل: "عملنا الفرح وروحنا الأوتيل يوم واحد وكان المفروض نسافر شهر عسل فحصل حاجة فى ورق السفر معرفناش نروح، فرجعنا على الشقة فاضية خالص وحاطين كاتيل الشاي على كرتونة كإننا إحنا الصنايعية، وهدومي مجتش، وكنت محتاج أشتري حاجة فنزلت أجيبها من السوبر ماركت وأنا لابس بدلة الفرح، بس بعد فترة كل ده عدى".
ووصف أحمد عبد الوهاب زوجته بأنها "وش السعد" عليه، قائلاً: "من ساعة ما اتجوزنا وكل خطواتي ماشية كويس جداً الحمد لله، يعنى مسرحية أنستونا ومسلسل 1000 حمد الله عالسلامة، والبيت بيتي والحشاشين، وأشغال شقة، وغيرهم .. الحمد لله".
