حسام حبيب يرد على رسائله الصوتية المسربة بشأن أهل شيرين عبد الوهاب
كتب: مؤمن نصر
علق المطرب حسام حبيب، على رسائله الصوتية المسربة، بشأن أزمة حسابات شيرين عبد الوهاب، والتي أثارت جدل واسع على مواقع التواصل الاجتماعي خلال الساعات القليلة الماضية، حيث اتهم فيها "حبيب"، شقيق النجمة شيرين عبد الوهاب، ببيع حساباتها على السوشيال ميديا.
وصرح حسام حبيب، لبرنامج ET بالعربي، قائلاً: الفويسات المنتشرة ليا دي متاخدة من تليفوني وأنا مصرحتش بالكلام ده، وأنا هقدم بلاغ للنائب العام ضد اللي سرقهم، ودي جريمة يعاقب عليها القانون، وأي حد هينشر كلام أنا مصرحتش بيه هعمل ضده بلاغ وأنا بحذر اللي هينشر.
وأضاف: أما الموضوع اللي في الفويسات إن أخوها مضى توكيل بأثر رجعي وإنه يتنازل عن السوشيال ميديا الخاصة بشيرين عبد الوهاب دون علمها، في بلاغ شيرين قدمته عن طريق المحامي ياسر قنطوش بتقول فيه نفس الكلام اللي قولته.
واستكمل حسام حبيب كلامه: أنا مبقولش كلام مرسل، والبلاغ بيقول نفس الكلام ده، والمفروض إن الناس بدل ما تهاجم تفهم مين السبب في إن شيرين مش عارفة تتواصل مع جمهورها ولا عارفة تنزل أغاني جديدة وهما اللي تسببوا في مشاكل كبيرة جدا بينها وبين شركة الإنتاج بتاعتها.
وأشار: سبحان الله أنا مقصدش إني أقول أي حاجة لأي حد، ولا أصرح بالكلام ده، أنا بتكلم مع حد في محادثة خاصة على تليفون وحد خدها وسربها وده شئ غير أخلاقي وأي حد يتداوله هيبقى نفس الموضوع، إنما المحتوى بتاع الفويسات صحيح.
وفي التسجيل الصوتي المتداول على منصة "إكس"، هاجم حسام حبيب عائلة شيرين ووصفهم بظالمين، حيث قال: الأغاني خلصانة وزي الفل وتحفة بس هي مش في المود ده من كتر اللي بيتعمل فيها من أهلها، هي مش هتطلع تتكلم عنهم لأنهم أهلها، لكن أنا قررت أتكلم لأن دول مش أهلي ولا يشرفني إنهم يكونوا أهلي، دول ناس ظلموها باعوا السوشيال ميديا بتاعتها متخيل؟.
وأضاف حسام حبيب: استولوا على بيوتها وعلى فلوسها وعلى طاقتها، مش هقدر أقول عملوا فيها إيه، قابلوا الإحساس ظلم، أخوها تعدى عليها في غرفة نومها وضربها بسلاح، أنتوا ما تعرفوش حاجة، تهديدات 24 ساعة، حرام ولا غلطة من دول هي ليها فيها يد.
وتابع: حقها تاخد علاج وتتخن وحقها عليكم تصبروا عليها، الصبر الجميل وبشر الصابرين إذا صبروا، وأنا بقولك الأغاني خلصانة بس هي في حالة أنتوا مش فاهمينها، منتهى الظلم أقرب الناس ليك هو اللي بيدبح، الله يكون في عونها ويوقفها على رجليها، أدوها مساحتها، لو مش أنتوا اللى هتصبروا عليها مين هيصبر عليها، قولولها حتى لو بطلتي تغني هنفضل نحبك وشوفوا هيحصل فيها إيه، أنا أقرب واحد ليها وعارف شخصيتها وعارف نفسيتها.
اقرأ أيضاً: تواصل الاختفاء.. ماذا يحدث مع شيرين عبدالوهاب؟
View this post on Instagram
