صالح جمعة يعلن مقاضاة شقيقه عبد الله للزمالك: هيدفعوا غصب عنهم

أعلن صالح جمعة لاعب الأهلي السابق، تقدم عبد الله جمعة لاعب الزمالك السابق، بشكوى ضد نادي الزمالك للحصول على مستحقاته المتأخرة، وقال: "مكنتش مقتنع باستبعاد عبد الله جمعة من الزمالك، كلمت أحمد سليمان وعبد الواحد السيد الناس دي مكانتش أمينة على واحد من كباتن الفرقة، واستبعاد عبد الله جمعة في خيانة لعبد الله بصراحة عبد الله اتغدر بيه في الزمالك".

وأضاف صالح جمعة، في تصريحات تليفزيونية: "رحت اتكلمت مع أحمد سليمان وقالي إنه مكمل معانا والناس دي شالت عبد الله من القايمة قبل يوم واحد من الانتقالات ما تقفل ده الأهلي مكانش بيعمله."

وتابع: "عبد الله جمعة كان بيبقى عنده مزق وبياخد حقن عشان يرجع بسرعة ويلعب في الزمالك وكنت أقوله انت لسة صغير على الحقن دي كان يقولي عشان مفيش حد، مع احترامي إزاي تمشي عبد الله وتخلي لاعب عنده 40 سنة مين هيديك أكتر مع احترامي الكامل لعبد الشافي انا بحب عبد الشافي جدًا".

واختتم: لكن أنا استفدت كزمالك من عبد الشافي في إيه؟ فتوح لما بيغيب مين بيلعب، عمر جابر طب انت مشيت عبد الله جمعة ليه؟ مفيش لجنة كورة بتخططلك، عبد الله جمعة ليه أكتر من 25 مليون جنيه عند الزمالك وهناخد الفلوس دي الزمالك هيدفع غصب عنه زي ما هو لسة دافع لخالد بوطيب 50 مليون جنيه ورفعنا قضية فعلا والقضية ماشية في اتجاه كويس.