خالد سرحان عن تعامل الفنانين مع السوشيال ميديا: «لازم تقرب من الجمهور بحدود لأنك مثل أعلى»

تحدث الفنان خالد سرحان عن علاقته بمواقع التواصل الاجتماعي خاصة وأنه نشط عبر حساباته ويتفاعل مع جمهوره، خلال لقاء له ببرنامج «عيش صباحك» على «نجوم إف.إم»، مع يوسف التهامي وفانا إمام.

وقال خالد سرحان: «أنا معايا شخص واحد فقط لأني مش ببقى فاضي دايما للسوشيال ميديا هو بس بيقول لي الناس مشغولة بإيه وبتتكلم عن إيه فببدأ أشوف لحد ما نطلع بإفيه حلو لأني واحد من الناس وبحب أسخر زي المصريين بالظبط لكن طبعا بأدب».

وأكد الفنان خالد سرحان: «التريندات وصناعتها مش في مصلحة الفنان، اعمل التريند بشغلك أو بمشهد قوي ويببقى هو ده التريند، لأنك لازم تقرب من الجمهور بحدود لأنك في الآخر مثل أعلى، ما تبقاش متواجد طول الوقت، ولازم تبقى عزيز، وفي حتة معينة الناس شايفاك عالي، لأنك ممكن تتزحلق وتنزل للقاع».

وتحدث عن تطبيق «تيكتوك»، وقال: «بقى فيه نجوم في هذا التطبيق والمجال بقوا مفروضين علينا، هو ممكن يبقى كاراكتر مطلوب، زي مثلا ما أستاذ داوود عبد السيد جاب شعبان عبد الرحيم في مواطن ومخبر وحرامي ووظفه صح، لكن مش مجرد أجيبه أعمل بيه أي حاجة»، مشيرًا إلى أن «الثلاثي شيكو وهشام ماجد وأحمد فهمي كانوا بيعملوا الأول حاجات على النت وبعدين جم في فترة هم اللي شالوا الكوميديا بعد 2011».

وعن أحدث أعماله الفنية قال إنه شارك كضيف شرف في فيلم جديد بعنوان «لوكاندة دلال» إخراج شادي لينين الرملي بمشاركة عمر متولي، وأيضًا فيلم «آل شنب» مع ليلى علوي وسوسن بدر ومحمود البزاوي.

وعن قلة مشاركاته في الأعمال السينمائية، قال: «يمكن أنا غلس في الاختيارات شوية ومش منتمي لمجموعة معينة لكن منتمي لنفسي، وأنا مش بحب الكوميديا اللي بالعافية لكن بحب الكوميديا اللي مبنية على موقف مش مجرد إيفيهات ورا بعض».

اقرأ أيضا: «ابن من أبناء مسرح الدولة».. محمد رياض يرد على جدل تكريم أحمد آدم في المهرجان القومي