داليا المتبولي: الكلام اللي قاله أحمد السبكي عن ياسمين صبري مش مفبرك

نفت الإعلامية داليا المتبولي، ادعاءات المنتج أحمد السبكي بأنها فبركت تصريحاته له عن الفنانة ياسمين صبري خلال الفترة الماضية حيث قال:  "ياسمين صبري ماتقدرش تشيل نص فيلم".

وقالت داليا المتبولي، خلال تصريحات تليفزيونية: كلام السبكي عني قد يضر سمعتي الإعلامية، والحقيقة أني استأت جدًا بعد تصريحات السبكي واتهامه ليا أني فبركت الكلام اللي قاله على الفنانة الجميلة ياسمين صبري، لأن أنا لا فبركت ولا أي كلمة قالها ليا دخل فيها.

وأضافت: كل كلمة قالها طالعة من لسانه وكان مُصر عليها، ولما اتكلم عني وقال الست المذيعة استأت كمان من الكلمة أنا أستاذ إعلام وبدرس لطلابي إزاي الإعلام يكون صادق، ده يسيء ليا أنا بشكل كبير.

وأكملت: الحكاية إني بعمل بودكاست وبجيب فيه النجوم في مجالهم وأنا أكن كل الاحترام للمنتج أحمد السبكي وشايفة أنه راجل مؤثر في مجاله وقررت أعمل معاه البودكاست، وسألته سؤال مباشر إيه رأيك في النجمة ياسمين صبري؟، هو كان مُصر إنها متشيلش نص فيلم، وأنا حاولت إني أرفع عنه الحرج وأغير في كلامه علشان ميندمش عليه بعد كده ولكنه كان مُصر.

وواصلت: قولتله ليه بتقول عليها متشيلش نص فيلم؟ قالي متنفعش، قولتله طيب مين اللي يشيل، قالي أسماء 3 نجوم وأن هما دول اللي بيعرفوا يمثلوا.

واختتمت: بعد كده الحاج أحمد بعتلي أشيل الفيديوهات لأن تصريح ياسمين صبري هيزعلها منه، وأنا بالفعل شيلت الفيديوهات من عندي وحاولت أفتح القناة بتاعتي وقولت بلاش مشاكل ويمكن هو ندم على تصريحاته، وأنا اضريت جدا من الموضوع ده.