محمد الشرنوبي: بمر بأزمة  مشابهة لأزمة شيرين عبد الوهاب مع روتانا

كشف الفنان محمد الشرنوبي تفاصيل جديدة حول أزمته مع المنتجة سارة الطباخ، مشيرًا إلى أنه يمر بأزمة مشابهة للفنانة شيرين عبد الوهاب مع شركة روتانا في حذف الأغاني من موقع يوتيوب.

وقال محمد الشرنوبي عبر فيديو على حسابه الشخصي بموقع تبادل الصور والفيديوهات إنستجرام، قائلا: أولًا بخصوص موضوع شيرين أنا مش فارق لي أى حاجة غير إني سمعت صوتك، وأن إحنا كجمهورك مستمتعين بصوتك ويا رب المشكلة اللى بينك وبين روتانا تخلص في أسرع وقت عشان نعرف نسمع صوتك بشكل طبيعى، وتأخدي حقك.

الشرنوبي: أنا أكتر حد حاسس بأزمة شيرين عبد الوهاب

وواصل محمد الشرنوبي: أكتر حد في الفترة دى حاسس بشيرين هو أنا، لأن بقالي 5 سنين في قضايا ومشاكل مع سارة الطباخ في الشركة اللى كنت ماضي معها، ومن سنتين وكام شهر بالظبط طلع حكم بالقضاء بانتهاء عقدي، وطلعت الشركة تقول لأ، وأنا طلعت أقول آه، لحد ما طلع 3 أحكام تاكدت أن العقد انتهى خلاص ومعنديش أي التزامات بأي شكل، وأكتر حاجة بتثبت أني بشتغل في التمثيل وماضي مع شركة من أهم شركات الوطن العربي وهي شركة مزيكا للمنتج محسن جابر، ودي شركة كبيرة وعندها شؤون قانونية وبتراجع ورق اللى بيشتغل معاهم، فالناس دي اتأكدت أن كل حاجة انتهت وإني معنديش التزامات، لأي شركة تانية ومضينا مع بعض وابتدينا نشتغل.

واختتم محمد الشرنوبي: المشكلة اللى بتواجهنا دلوقتي أن الأغاني بتفضل موجودة على كل المنصات، ولكن في صغرة في يوتيوب مش عارفين، نتعامل معاها وهي لما بنزل فيديو على يوتيوب، بيتحجب واليوتيوب بيدي مهلة للي عمل طلب إلغاء الأغنية 6 أيام عشان يرفع قضية ولو رفع قضية بندخل في سنة.