بعد اعتذارها … تامر حسني لـ شذى: ولا يهمك المسامح كريم
كتب: نسرين إبراهيم
رد الفنان تامر حسني على الفنانة شذى عقب اعتذارها له، بعد حديثها عنه في مقابلة تلفزيونية عنه بشكل غير لائق.
قال تامر حسني تعليقا على رسالة اعتذار شذى: "ولا يهمك يا أوزه كفاية إنك كتبتي الكلام الجميل ده ربنا يوفقك ويسعد قلبك يارب المسامح كريم".
لترد عليه شذى: "روح قلب أوزه تستاهل كل حاجه حلوة والله يا أبو قلب أبيض وحلو زيك".
شذى تعتذر لـ تامر حسني
وكانت شذى التقت بتامر حسني في حفل بالساحل الشمالي ونشرت صورتها معه وكتبت رسالة وجهت من خلالها اعتذارها قائلة: "من غير ما أفكر وأحاول ارتب الكلام إنت أكتر واحد في العالم عارف حبي ليك قد إيه وأكتر واحد برضوا عارفني وعارف أني على الله حكايتي ودماغي بتسوحني كتير، حقك عليا ودايما العتاب بيكون على قد الغلاوة وعلشان غلاوتك كتير هبت معايا زيادة متزعلش مني، وهتفضل صاحب عمري اللي عدينا مع بعض كتير الوحش قبل الحلو يا وش قفص قلبي".
هجوم شذى على تامر حسني
وسبق وتحدثت شذى عن تامر حسني خلال لقائها في برنامج "أنا سعيد"، الذي يقدمه الإعلامي سعيد جميل، عبر قناة "القاهر والناس": "سيرة تامر حسني بتقلبلي مزاجي، مش عشان أنا مبحبوش لأ أنا بحبه جدًا وإحنا عشرة سنين، ولكن تامر من وقت وفاة أبويا وأمي مظهرش، ولو ظهر بيظهر كضيف شرف، ومش بتكلم على الشغل أنا بتكلم على الإنسانية، أنا مليش حد هنا ومعنديش إخوات وكل عيلتي برا مصر".
وتابعت: "على المستوى الشخصي والمهني تامر ضيف شرف في حياتي، خاصة إني بتعرض لأزمات كتير في السوق وتغير الذوق، ولكن تامر في إيده إنه يصلحلي حاجات كتير وأنا أستاهل ده لأن الصحاب لازم يكونوا ضهر لبعض، خصوصا لو أنت كنت كويس معاه قبل كده، عشان كده بزعل لما بتيجي سيرة تامر، لأني مكنتش مستنية منه حاجة كنت مستنية يسأل عليا".
