«عيب بقي ارحمونا».. أول تعليق من فريدة سيف النصر على حضورها الدير جيست حافية

علقت الفنانة فريدة سيف النصر، على ما تردد مؤخرا بشأن حضورها حفل توزيع جوائز الدير جيست حافية القدمين، مؤكدة أن هذا لا صحة له.

وكتبت فريدة سيف النصر، عبر حسابها الخاص على موقع التواصل الاجتماعي فيسبوك، قائلة "والله زهقت ليه مركزين معايا أوي وبالكذب، علشان كده مابحبش احضر احتفالات، اخر اشاعه اني حضرت المهرجان حافيه من غير جزمه لامؤاخذه ايه العبط ده، أنا مابرضاش اتكلم، لكن لما كل المواقع تكتب كده لأنهم بينقلوا من بعض، طيب انا ونازله من باب السياره الكعب اتكسر ازاي ماحدش يسألني إتعودت خلاص عالعيون الحلوه، فا بقيت رجل عاليه ورجل واطيه، وربنا يخللي سمير فقيه الصحفي الكبير استقبلني ومسك كتر خيره ومشي بيا كنت هاروح والله".

وأضافت فريدة سيف النصر: "فضلت متحمله وانا مروحه قلعتها لاني هقع بسبب الكعب معرفش أنهم سايبين الناس كلها بفساتينهم وبيصوروا رجلي مراقبين حتي انفاسي مع الأسف، بجد اهم حاجه عندي حب جمهوري انتم بقي لحساب مين اعملوا مابدالكم زهقت، أما الميك اب فا أنا اصلا حتي شغلي ما بحطش إلا روج ما بحبش الفوند تان خالص.. وشعري طبعا معمول بس لاماه أنا ماما ياجماعه".

واختتمت: "بصوا بقي كفايه راي جمهوري هما بيحبوا طبيعتي وبساطتي، وفعلا من تواضع لله رفعه، واظن واضح، وعلي فكره انا باالبس المناسب لسني ومكانته والحمدلله عجبكم وقولتم شيك انما من غير جزمه ده هبل ،عيب بقي ارحمونا، وبكل اللي بيحصل ده انا تريند على طول يااولادي حافيه بقي منكوشه اهو الحب من الله موتوا".