سعد الصغير عن واقعه المخدرات أمام النيابة: عديت من جمارك أمريكا والدوحة واتمسكت في مصر
كتب: محمد معلاوي
ننشر أقوال المطرب الشعبي سعد الصغير، في جلسة محاكمته على خلفية اتهامه بحيازة سجائر الكترونية تحتوي على المخدرات من جوهر الحشيش المخدر، حيث أنه في أثناء عودته من أمريكا مرورًا بالدوحة متوجهًا إلى مصر، وبتفتيش حقائبه عُثر على 9 سجائر من فئة الفيب تحتوي على المخدرات.
الأقوال
واستمع رجال التحقيق بالنيابة العامة لاعترافات سعد الصغير، في اتهامه بحيازة المواد المخدرة، وبسؤاله عن ما سبب قيام منظم الحفلة بإعطائه تلك السجائر الإلكترونية؟ أجاب: هو أدهالي هدية وقالي فرقها على الفرقة بتاعتك عشان هو عارف إني مش بشرب سجاير فانا أخدتهم منه.
وجاءت اعترافات سعد الصغير في قضية تعاطي المخدرات على النحو التالي:
س: ما محتوى تلك الأجهزة للسجائر الإلكترونية؟
ج: هي جواها فيب بنكهات وروائح مختلفة عنب وتفاح وحاجات كده، وأنا مسألتوش دي عبارة عن إيه لأني كده كده مش بشرب سجاير وكنت فاكرها سجاير عادية.
س: صف لنا مكان وضعك لتلك الأجهزة للسجائر الإلكترونية بحقيبتك؟
ج: هم كانوا مع لبسي في الشنطة لأنها أصلا شنطة مش كبيرة واتفتشت وأنا مسافر من أمريكا، واتفتشت وأنا في الدوحة واتفتشت لما جيت مصر.
س: وما قصدك من إحراز تلك الأجهزة للسجائر الإلكترونية إذًا؟
ج: كنت فاكرها سجائر عادية فيب، وكنت هديهم للفرقة بتاعتي هنا على سبيل الهدية.
س: وكيف تم ضبطك؟
ج: أول ما وصلت فتشوا الشنطة بتاعتي وخدوا تسعة من سجائر الفيب وقالولي التسعة دول ريحتهم مش كويسة وعملولي محضر بيهم.
س: وما مضمون الحوار الذي دار بينك وبين القائمين بضبطك؟
ج: أنا أول ما دخلت على فرد الجمرك لقيته بيسألني إنت معاك حاجة؟ وقلت له معايا سجاير فيب، لقيته قالي دول هيتجمركوا، وفعلا خد الشنطة وفتشوا ولقوا فيها الفيب ده، وقلت لهم دي سجائر فيب عادية واخدها من واحد في أمريكا، لقيت واحد من الجمرك مسك تسعة سجائر فيب وقالي دول ريحتهم مش حلوة، قلت له هم كلهم فيب زي بعض، قالي لا التسعة دول ريحتهم مش كويسة.
س: وما سبب قيام سالفي الذكر بضبطك إذًا؟
ج: عشان هم بيقولوا إن فيه تسعة سجائر من الفيب ريحتهم مش كويسة.
س: صف لنا المضبوطات التي عثر عليها بحقائبك تحديدًا؟
ج: أنا كان معايا بالضبط تسعة سجائر إلكترونية اللي اداهم لي راغب هدية للفرقة بتاعتي، وبتاع الجمرك شاف فيه تسعة منهم قالي إن ريحتهم مش كويسة، وهم شكلهم زي الباقي عادي، ألوان مختلفة وأشكال مختلفة وجواهم سائل فيب عادي.
س: وملك من تلك المضبوطات؟
ج: هم بتوع واحد اسمه رأفت وهو اداهم لي هدية.
س: وما سبب ضبطها بحوزتك بميناء القاهرة الجوي آنذاك إذًا؟
ج: أنا كنت واخدهم أفرقهم على الفرقة بتاعتي عشان فاكرهم سجائر فيب عادية.
