«بحاول أرضي ربنا».. هاني البحيري يكشف سر تصميمه لأزياء المحجبات فقط في بداية مشواره

كشف مصمم الأزياء هاني البحيري، عن كواليس اعتزاله واتجاهه لتصميم ملابس المحجبات فقط، وذلك في بداية مشواره بعد تأديته فريضة الحج، قبل التراجع عن قراره.

وأوضح "البحيري" بقوله: "مع أول حجة ليا، استشرت شيخ وجاتلي رعشة، فنزلت للشيخ قولت له أنا دخلي كذا وأبويا الله يرحمه توفى، حتى ميراثي عملت بيه كذا، قالي شغلك غلط وفلوسك ودخلك حرام، هو قالي كدة ومسألتوش ليه، كنت في حالة يرثى لها".

وتابع: "أحرمت ونازل أخلص الحج، وخلاص هناخد الطيارة وهنمشي على مكة، وفي الآخر أداني نصيحة معرفتش أترجمها إزاي؟ قالي اعمل زي بائع السلاح، قولتله إزاي؟ قالي بائع السلاح ممكن يبيع سكينة، فاللي ياخدها ممكن يقتل بيها أو ياخدها يدبح بيها شاه أو حاجة، قولتله برضه مش فاهم، إيه دخل ده في ده؟ قالي مثلا إديها الفستان أي كان شكله عريان، قصير، طويل، وإديها ما يغطيها، لبسته ما لبستهوش هي حرة وخلص ذمتك مع ربنا".

واستطرد: "نزلت من الحج، مقتنع، وقولت هفتح للمحجبات بس، وتعرضت لمشكلة كنت هتقتل فيها، جاتلي عائلة كلهن محجبات، وجات معاهم مرات أخوهم، قالتلي لو جوزي جه، متقولش إني بعمل عندك فستان، قولت خلاص مفيش مشكلة، كنت صغير وقتها وأنا بعمل البروفة لقيت حد داخل لابس بنطلون قصير، ودقنه طويلة، وقال لو في راجل في البيت هقتله، فأمي دخلتله من الشقة التانية، قالت له أنا اللي بخيط يا حبيبي، وأنا نطيت من البروفة لليفنج روم للمطبخ، وقعدت تحت الترابيزة ساعتين علشان استخبى وكأننا بنسرق أو بنعمل حاجة حرام مع إني كنت جاي وناوي النية لله إني اشتغل بس محجبات، وأرضي العباد ورب العباد، فقولت خلاص هشتغل عادي والحمد لله رب العالمين عدت، كدة كدة هتحاسب".

وأكد مصمم الأزياء الشهير على أنه يحاول إرضاء الله في عمله ويرضي غريزته بقوله: "أنا مستمر فيه لحد النهاردة عندنا مشاكل كتيرة، وجزء كبير من تمسكي بالشغلانة لحد النهاردة أني بحبها"، وجاء ذلك خلال استضافته مع الإعلامية راغدة شلهوب في برنامج "سابع سما" على شاشة قناة "النهار".

يذكر أن، هاني البحيري مصمم أزياء مصري، بدأ تصميم الأزياء منذ أكثر من 20 عامًا.