شهادة شقيق إحدى الناجين بحادث الجلالة.. مفاجأة تبرئ سائق الأوتوبيس

روى شقيق إحدى الطالبات الناجين من حادث أوتوبيس طريق الجلالة، تفاصيل الحادث مفجرا مفاجأة قد تبرئ السائق من المتسبب في واقعة انقلاب الأوتوبيس، موضحا السبب الحقيقي وراء الحادث، من خلال شهادة شقيقته عقب شفائها.

وقال شقيق إحدى مصابي حادث طريق الجلالة عبر حسابه الشخصي بموقع فيسبوك: الحمد لله بعد أكتر من 22 ساعة رجعنا البيت ودينا - شقيقتي الطالبة المصابة- معانا الحمد لله كويسة وبخير نحمد ربنا.

وأضاف: علشان أبرئ ذمتي من ربنا فيه ناس بيحاولوا يشيّلوا السواق الموضوع علشان يحافظوا على نفسهم، من خلال كلام أختي السواق كان طبيعي ومكنش ماشي بالسرعة الجنونية اللي بيقولوا عليها، كل اللي حصل إنهم وهم في الطريق شموا ريحة شياط في الباص، ولما حاولوا يقولوا للسواق السواق كان بينكر علشان ميسببش حالة ذعر بينهم.

وتابع: ولكن لما السواق حاول يدوس فرامل علشان يعرف يدخل الملف الفرامل فصلت منه، وكان قدامه حل من اتنين، إما مش هيعرف ياخد الملف بسرعة دي ويقع من على الجبل، أو إنه يقلب الأتوبيس على الجنب التاني علشان ميقعوش وده اللي حصل.

وواصل: قبل ما يقلب الباص نده على كل اللي في الباص، وقالهم امسكوا كويس علشان هنقلب الباص على الجنب البعيد عن الجبل، وكان لازم الموضوع ده يتحكي بالتفصيل، لأنها كل ما تحصل حادثة التفاصيل ما بتبقاش كاملة، وخصوصًا بعد خبر إن السواق كان بيتعاطى مخدرات، لكن السواق كان باين في حالة طبيعية.