عباس أبو الحسن يتحدث عن «كثرة وفيات» الفنانين والشخصيات العامة وأصدقائه
كتب: متابعات
أعرب الفنان عباس أبو الحسن، عن صدمته من كثرة الوفيات من الوسط الفني ومن أصدقائه، مشيرا إلى أن الجميع يقف في طابور واحد يقترب من حافة القبر.
عباس أبو الحسن يتحدث عن «كثرة وفيات» الفنانين
وكتب عباس أبو الحسن، منشورا جاء فيه: "كنت برجع في الصفحة بتاعتي بدور على پوست معين كتبته من كذا سنة.. اتصدمت لما شفت كم الناس اللي ماتت من الأصحاب الأعزة، والشخصيات العامة، والقامات الفنية، منهم كتير ماتوا ومحصلوش نص متوسط الحياة المفترض، واعتراني إحساسين وفكرتين متناقضين؛ إزاي إن جميعنا في طابور واحد نقترب من حافة القبور، وإن القدر ممكن، ولأسباب غامضة، يدفع بك في لحظة إلى أول الطابور".
وتابع: "ومش لازم تكون مريض بمرض عضّال أو في حادثة، كتير ماتوا وهمه نايمين، وهمه في الشغل، عندي صديق عزيز مات وهو في الچيم وصديق عزيز آخر مات وهو في الجو على طيارة هو الكابتن بتاعها، الإحساس الأول إنك لازم تحاول تعيش متسق مع ذاتك، وده يتطلب إنك تعرف نفسك معرفة حقيقية، تستمع بعلاقات حقيقية دافئة مع ناس بتحبهم وبيحبوك، تعيش بشرف إنك تدرك إن الشخص الوحيد في الكون اللي يفرق معاك هو شايفك ازاي هو إنت".
وأكمل: "وإنك تعيش من أجل غرض ما الأفضل إنه يكون غرض نبيل، ان مافيش حد مشي في رحاب القطيع وكان متحقق وراضي وفي سلام مع نفسه، ان الحياة فعلا قصيرة وعبثية، ان الحياة لا تقاس بالنجاح وإلا مكانش فيه مشاهير وعظماء وأساطير انتحروا دون سابق إنذار، إن الحياة في الحقيقة تُقاس بعدد التجارب الحياتية اللي أنت عشتها بشغف وبكلك. الحاجة التانية؛ انك تدرك ان الفناء قادم لا محالة وبدون انذار، وان الكفن مالوش جيوب، وان فجأة وانا أعني فجأة، هتصحى يوم تكتشف فيه إن الحياة مبقتش قدامك.. الحياة وراك".
واختتم الفنان عباس أبو الحسن منشوره، قائلا: "إن اهم حاجة في الإدراك ده، ان لما يحصل دة، متحسش بالذعر، لانك فعلا عشت مش انك أخدت خازوق متغري بكل احلامك المجهضة، انك عملت حجات كويسة اكتر ما عملت حجات وحشة، وانك حبيت واتحبيت، ومسيبتش العالم أبشع من لما جيت فيه، واخيراً انك تسامح نفسك وتطبطب على روحك مش تجلدها، وانك تقول لنفسك: أن أي حاجة عملتها كانت مدفوعة بإدراكي وفهمي ومخاوفي وقتها".
