مديحة حمدي: الحجاب فرض لا خلاف عليه ... وافتكرت طرحتي وقت الزلزال

أكدت الفنانة الكبيرة مديحة حمدي إنها بدأت منذ صغرها تتجه للملابس المحتشمة بتأثير من نشأتها والطريقة التي رباها والدها بها.

وأضافت خلال حوارها مع الإعلامية مروة صبري في برنامج "قعدة ستات" المذاع عبر قناة ألفا: "الحجاب أولا فرض لا خلاف عليه، وأنا بدأت أدخل على ديني برفق من سن 13 و 14 سنة، ولقيت نفسي الكم ابتدى يطول شوية شوية".

أوضحت مديحة حمدي أنها تحرص على الاحتفاظ بمكانتها عند جمهورها قائلة: "أنا بحب جمهوري وأشكر ربنا إني محبوبة منهم، وعلشان كده حريصة دايما أبقى موضع احترامهم".

وتابعت: "لما احترفت التمثيل في السكرتير الفني، أبويا قاللي اسم أبوكي وإخواتك أمانة معاكي، ولما اتخطبت لضابط شرطة قاللي أنا عايز أتزوج وأعمل بيت، وعارف إني خاطب فنانة ومش عايزك تبعدي عن الشغل، لكن من فضلك ما تخليش ضابط زميلي في يوم يرميلي مجلة على المكتب فيها صورة مش لطيفة".

واستعادت مديحة حمدي ذكريات خاصة مع الحجاب وقت زلزال 1992 قائلة: "أنا تحجبت في رمضان 1992، ولما حصل الزلزال كلنا جرينا على السلم وافتكرت طرحتي، عايزة أقابل ربنا وأنا عاملة فرض من فروضه".