«بيركز في الرقص».. تامر أمين يعلق على تغريم الأهلي لـ إمام عاشور مليون جنيه

علق الإعلامي تامر أمين، على تغريم النادي الأهلي للاعب إمام عاشور مليون جنيه، موضحا أن اللاعب أصبح تريند وحديث الوسط الرياضي وغير الرياضي، خلال الأيام الأخيرة، بسبب واقعة أوضة اللبس.

تغريدة اعتذار

وقال تامر أمين، خلال برنامج «آخر النهار» المذاع على قناة «النهار»: «نشر إمام عاشور اعتذارا عما بدر منه في أوضة اللبس، وكلامه كان واضحا تجاه النادي وإدارته وجماهيره، ورضاه عن العقوبة الموقعة ضده، وأبرز مدى الفارق في الأحمر عن أي ناد اَخر».

وتابع: «فيه ناس كتير سنت سنانها وطبعا المتصيدين وإللي متضايقين بوجود إمام عاشور في الأهلي، حبوا يولعوا في الحريقة زيادة ويعلموا فورتينة ما بين الأهلي وإمام، فعجبني رد فعل إمام أنه عمل تغريدة اعتذار واضحة لإنه سكت كل المتخرسين وإللي عايزين يصطادوا في الماء العكر».

ولفت: «غرامة المليون جنيه في مش كتير على إمام عاشور، لأن الكابتن محمد رمضان لقى إن اللاعب محتاج يفهم أكتر المنظومة إللي هو فيه، صحيح إن إمام انضبط كتير عما قبله ولكنه ليس الانضباط الذي يوافق ويتناسب مع أخلاق وسلوكيات الأهلي ولاعبيه».

وتابع: «الكابتن محمد رمضان لاحظ إن إمام عاشور جزء كبير من تركيزه في السوشيال ميديا والتيرندات والرقص والاحتفالات والرد على الناس، ودي حاجة مش كويسة لأنها تؤثر على أدائه وتركيزه في الملعب، فبالتالي عقوبة المليون جنيه علشان ضبط إمام بشكل كامل في المستقبل، وإنه من غير المقبول خروجه مجددا عن النص، وفكرة إنه قال إزاي انا ملعبتش ده الخطأ الكبير مش قصة بس تجاوزه مع الشناوي، الأهلي عايز يعلم إمام وغيره إنه ملهوش حق انا مبلعبش ليه أنت جندي في الفريق وفقا لرؤية الجهاز الفني».