«فيه أم تبوس ابنها كده؟!».. مروة صبري تهاجم هاجر الشرنوبي

انتقدت الإعلامية مروة صبري الفنانة هاجر الشرنوبي، بسبب الصورة التي نشرتها الأخيرة، مؤخرًا، وهي تُقبل نجلها في عيد ميلاده، والتي رأى البعض فيها جرأة زائدة، وأنه لا يجوز للأم أن تقبل نجلها بهذه الطريقة.

مروة صبري تنتقد هاجر الشرنوبي

وأوضحت مروة صبري، خلال تقديم برنامجها «قعدة ستات»، أن الفنانة هاجر الشرنوبي، فنانة شابة قامت بأدوار جميلة وأنها لا تبحث عن «التريندات»، ولكن الصورة التي نشرتها مؤخرًا احتفالًا بعيد ميلاد نجلها لا تليق، قائلة: «أنا الصراحة مش عارفة أعلق أقول أيه، هي الفنانة كانت بتبوس ابنها في الصورة.. أيه المشكلة لما تبوس ابنها؟!.. تبوس ابنها تحضن ابنها تغرق ابنها حب، ولكن صورة بالمنظر دة ما ينفعش وما يصحش أنك تتصوريها مع ابنك».

وأضافت صبري: «الصراحة صورة استفزت الناس بشكل كبير ولأول مرة أنا ابقى واقفة مع السوشيال ميديا، أنتي ما يصحش تبوسي ابنك بالشكل ده في الأول والآخر ده راجل حتى لو عنده 13 سنة، بيروح المدرسة وبيشوف زمايله هناك، أنا ماشوفتش أم بتبوس ابنها بالشكل ده الصراحة، سواء راجل أو بنت ما ينفعش نبوسه كده، والناس اللي انتقدتك مش مريضة هو أنت اللي غلط».

وتابعت: «هو إنتي اللي ما يصحش أنك تبوسي ابنك بالشكل ده، مين قال أن الأم بتبوس ابنها بالشكل ده، ولو اتصورتي مع ابنك وعايزه تنزلي له صورة، وشوفتي صورة ما يصحش أنك تنزليها بتسىء ليكي ولابنك نزلتيها ليه؟.. أيه اللي خلاكي تنزليها؟، أنتي منزلاها للعالم كله هيشوفها، ومتضايقة أن الناس بتنتقدك؟!، لا الناس عندها حق لأن ما يصحش أنك تعملي ده أبدًا، ابنك كلها كام سنة وهيكبر وما يصحش أنك تبوسيه بالشكل ده، صورة مهينة ليكي وليه، الانتقادات كان فيها حق كبير جدًا».

هاجر الشرنوبي ترد على منتقدي صورتها مع ابنها

يذكر أن الفنانة هاجر الشرنوبي، علقت على الانتقادات التي وجهت لها بسبب صورتها مع ابنها والذي ظهرت فيها وهي تقبله من فمه أثناء احتفالهم سويا بعيد ميلاده وشاركتها على حسابها الرسمي  على "انستجرام".

وقالت هاجر الشرنوبي، في بث مباشر بموقع تبادل الصور والفيديوهات "انستجرام": صحيت الصبح على كمية كومنتات مش طبيعية واللي كتبينها مش طبعيين يعني ايه أنزل صور مع ابني وناس مريضة تدخل تكتب اي لازمتها البوسة ويغلطوا في التربية.. اي يجماعة ده اي المرض ده، أنا مش لاقية تفسير للي بيتكتب ده غير في قلوبهم مرض فزادهم الله مرضا، أنا مش لاقية أي تعليق إبني في عيد ميلاده وببوسه اي مشكلتكم الموضوع غريب جدا".

وتابعت هاجر الشرنوبي حديثها، قائلة: "أنا بشوف حاجات سلبية كتير جدا مش برد عليها بس ده عشان حاجة تخصني الحاجة اللي تخصني أنا بسمعها وبطنش ولكن مينفعش أبقى منزلة صورة لابني في عيد ميلاده وهو بيشوف التعليقات ويلاقيها بالسلبية دي  انتو ناس مخكم مريض، الصورة دي صورتنا كل سنة وهفضل أتصورها معاه لحد ما يكبر ويتجوز ويخلف.. روحوا اتعالجوا".